रायगड - सोशल मीडियावर लाईव्ह व्हिडीओ करण्याची नशा तरुणांमध्ये हल्ली वाढत आहे. सुसाट गाड्या चालवताना, अती उंच ठिकाणी गेल्यावर किंवा ट्रेकिंग करतानाही तरुणांना लाईव्ह व्हिडीओ करण्याची हौस असते. अशाच प्रकारे जंगलात अजगर पकडून त्याची हत्या करण्याचा लाईव्ह व्हिडिओ करणे पेण मधील पाच तरुणांना चांगलेच महागात पडले आहे. सोशल मीडियावर हा व्हिडीओ लाईव्ह झाल्यामुळे पेण वन विभागाच्या अधिकाऱ्यांनी या तरुणांना अटक केली आहे.
पेण तालुक्यातील खरबाची वाडी या गावातील नितीन लहू शिद, विजय बाळाराम शिद, एकनाथ धर्मा वाघ, हरिश्चंद्र येसू शिद, राम लक्ष्मण भल्ला या पाच तरुणांनी गावा जवळच्या जंगलात एक मोठा अजगर पकडला. अजगराला मारताना त्याचे सोशल मीडियावर लाईव्ह प्रक्षेपण करण्याचा मोह या तरुणांना आवरला नाही. मात्र तो प्रकार त्यांच्या अंगाशी आला आहे.
अजगराला मारताना व्हिडिओ सर्वत्र व्हायरल झाल्याने सहाय्यक वन संरक्षक अलिबाग किरण जगताप यांच्या मार्गदर्शनाखाली पेण वनविभागाचे वनक्षेत्रपाल प्रसाद गायकवाड, धामणी येथील वनपाल जे. आर. घरत, पेणचे वनपाल चौधरी, निधवली वनपाल ए.एम. काटकर, आपटे वनपाल आडे, गागोदे वनपाल अडकर यांच्यासह पेण पोलीस पथकाने खरबाची वाडी येथे छापा टाकून पाचही जणांनी अटक केली.
पाच संशयित आरोपींना वन्य जीव संरक्षक कायदा १९७२ चे कलम ९,५१,५२ अन्वये अटक करण्ता आली आहे. या पथकाला खरबाची वाडी येथे घटनास्थळी मृत अजगराची चरबीचे अवशेष तसेच रक्ताचे थेंब आढळून आले असल्याची माहिती पेण वनक्षेत्रपाल प्रसाद गायकवाड यांनी दिली. या आरोपींना आज पेण न्यायालयात हजर केले असता त्यांना २२ नोव्हेंबर पर्यंत पोलीस कोठडी सुनावण्यात आली आहे.
गुन्हा दाखल होताच व्हिडिओ केला डिलीट -
वनाधिकारी यांनी गुन्हा दाखल करताच या तरुणांनी सोशल मीडियावर वरील हा व्हिडीओ डिलीट केला. या व्हिडीओ मध्ये या तरुणांनी अजगराला मारुन त्याच्या शरीराचे तुकडे करताना दिसून आले आहेत.
