पनवेल - शेती आणि बांधकाम व्यवसायात गरिबांना लुटणाऱ्या माफियांना माफी नाही, असा इशारा पंतप्रधान नरेंद्र मोदींनी घोटाळेबाजांना दिला आहे. 2014 पूर्वी रिअल इस्टेट क्षेत्रात बिल्डर आणि माफियांची लूटमार मोठ्या प्रमाणात होत होती. त्या सरकारच्या काळात अनेक घोटाळे झाले. त्याचे पडलेले डाग आजही काँग्रेस आणि राष्ट्रवादीला धुऊन काढता आले नाहीत, अशी टीकाही मोदी यांनी यावेळी केली. ते खारघरमध्ये आयोजित सभेत बोलत होते.
डोंबिवली, ऐरोली, बेलापूर, पनवेल आणि पेणच्या उमेदवारांच्या प्रचारासाठी खारघर येथे पंतप्रधान नरेंद्र मोदी यांची सभा आयोजित करण्यात आली होती. सेंट्रल पार्कजवळच्या मोठ्या मैदानात झालेल्या या सभेत मोदींनी काही निवडक मुद्द्यांवरच भाष्य केले. यावेळी मासेमारी करणाऱ्यांसाठी नव्या योजना सुरू करणार असल्याचे मोदींनी सांगितले.
हेही वाचा - पंतप्रधान मोदींचा 'जबरा फॅन' : म्हणतो, ते माझे राम मी त्यांचा हनुमान !
तसेच पनवेलजवळ तयार होणाऱ्या 2 लाख घरांचे झोपडपट्टीधारकांना वाटप केले जाणार, असल्याचे मोदींनी सांगितले. शेतकऱ्यांच्या जमिनी हडपणाऱ्या आणि गरीबांच्या घराची स्वप्ने उद्ध्वस्त करणाऱ्या माफियांना संपवण्याचा प्रयत्न गेल्या 5 वर्षात झाला आणि पुढे तो हाईल, असेही मोदींनी सांगितले. तर शेतकऱ्यांच्या मागे सतत प्रामाणिकपणे ठाम उभे राहून विकास साधणाऱ्या भाजप सरकारला निवडून आणा, असे आवाहनही यावेळी मोदींनी केले.
हेही वाचा - विद्युत तार पडून शेतात काम करणारे दोघे ठार
मी नवी मुंबई विमानतळाच्या भूमिपूजनाला आलो होतो. आता लवकरच नवी मुंबई विमानतळावरून विमान उडण्यास सुरूवात होईल, असे मोदींनी यावेळी सांगितले. यावेळी आमदार प्रशांत ठाकूर, मंदा म्हात्रे, रविंद्र चव्हाण, गणेश नाईक व रविंद्र पाटील हे उपस्थित होते.
