रायगड - कर्जत तालुक्यातील खांडस येथील दुर्गम भागात राहणाऱ्या 16 वर्षीय मुलाने आपल्याच गावात राहणाऱ्या 8 वर्षीय अल्पवयीन मुलीवर अतिप्रसंग केल्याची घटना पुढे आली आहे. पीडित मुलीचे आई-वडील घरी नसल्याचे पाहून मुलगी भावाबरोबर अंगणात खेळत असल्याचा फायदा घेत. या मुलाने मुलीला घरात बळजबरी नेऊन तिच्यावर अतिप्रसंग केला. या 16 वर्षीय (विधी संघर्षग्रस्त) मुलावर नेरळ पोलीस ठाण्यात बाल लैंगिक अत्याचार संरक्षण कायद्यान्वये गुन्हा दाखल करण्यात आला आहे.
पोस्को अतंर्गत गुन्हा दाखल -
या प्रकरणी पीडित मुलींच्या कुटुंबियांकडून नेरळ पोलीस ठाण्यात तक्रार दाखल करण्यात आली. त्यानंतर नेरळ पोलिसांनी या 16 वर्षीय मुलावर बाल लैंगिक अत्याचार संरक्षण कायद्यान्वये (पोस्को) गुन्हा दाखल करण्यात आला. दरम्यान, या 16 वर्षीय विधी संघर्षग्रस्त मुलाला नेरळ पोलिसांनी ताब्यात घेत कर्जत येथील बालसुधारगृह ठेवण्यात आले आहे.
