पुणे - राज्यपाल भगत सिंह कोश्यारी (Bhagat Singh Koshyari) आणि भाजप प्रवक्ते सुधांशु त्रिवेदी (Sudhanshu Trivedi) यांनी छत्रपती शिवाजी महाराज यांच्या बाबतीत अवमानकारक वक्तव्य केल्यानंतर विरोधी पक्षाकडून त्यांचा निषेध केला जात आहे. छत्रपती शिवाजी महाराजांचे वंशज आणि भाजपचे राज्यसभा खासदार उदयनराजे भोसले (Udayanraje Bhosale) यांनी देखील याबाबत त्यांची भूमिका मांडली आहे. भगत सिंह कोश्यारी आणि सुधांशु त्रिवेदी यांची हकालपट्टी करावी अशी मागणी यावेळी उदयनराजे यांनी केली आहे. तसेच याबाबत त्यांनी थेट पंतप्रधान नरेंद्र मोदी यांना पत्र लिहिले आहे. शिवाजी महाराजांबद्दल अवमानकारक वक्तव्य करणाऱ्यांवर ठोस कारवाई करण्याची मागणी देखील त्यांनी केली आहे. पुण्यात आयोजित करण्यात आलेल्या पत्रकार परिषदेत छत्रपती उदयनराजे भोसले बोलत होते. येत्या 28 तारखेला जर काही निर्णय नाही झाला तर आम्ही आमची भूमिका स्पष्ट करू, असं देखील यावेळी उदयनराजे म्हणाले. (bhagat singh koshyari shivaji maharaj controversy).
आपली आजपर्यंतची वाटचाल कोणाच्या विचारांवर झाली? - छत्रपती शिवाजी महाराजांचा विचार जुना झाला हे जेव्हा मी राज्यपाल यांच्या तोंडून ऐकलं तेव्हा क्षणभर मला काही समजलं नाही. राज्यपालांनी जे वक्तव्य केलं त्याला आधार काय? ज्यावेळी देशभरात अनेक राजे लोक मुघल साम्राज्याला शरण गेले त्यावेळी एकमेव छत्रपती शिवाजी महाराजांनी मुघलांना विरोध केला. लोकांना गुलामगिरीतून सोडवण्यासाठी, अत्याचार दूर करण्यासाठी महाराजांनी प्रयत्न केलं. देशात, जगात अनेक योद्धे होऊन गेले पण शिवाजी महाराजांनी जी लढाई लढली ती सर्वसामान्य लोकांना गुलामगिरीतून मुक्त करण्यासाठी होती. छत्रपती शिवाजी महाराज हे लोकांचे स्फूर्तीस्थान आहेत. जर महाराजांचे विचार जुने झाले आहेत तर आपली आजपर्यंतची वाटचाल कोणाच्या विचारांवर झाली? असा सवाल यावेळी उदयनराजे यांनी केला.
यापुढे अवमान करायचा प्रयत्न केला तर नेस्तनाबूत करू - सर्वधर्म समभाव हा विचार महाराजांनी त्यावेळी मांडला होता. त्या विचाराच्या आधारावरंच देश अखंड राहू शकतो. छत्रपती यांची विचारधारा सोडून देश चालणारच नाही. तरी पण अशी वक्तव्य केली जातात तेव्हा चीड येते. कुटुंब म्हणून महाराज यांनी केवळ घरातल्या लोकांना नाही मानलं, तर देशातल्या प्रत्येकाला आपलं मानलं. सर्वसामान्य लोकांचा समावेश राज्याच्या कारभारात असावा ही संकल्पना महाराज यांचीच होती, असे देखील उदयनराजे यावेळी म्हणाले. देव तर आपण बघितला नाही पण देवाच्या रूपाने युगपुरुष जन्माला आले होते. आज त्यांचा अपमान करण्याचं धाडस हे निर्ल्लज्ज लोक करत आहे. राज्यपाल कोश्यारी बोलले तेव्हा शरद पवार, नितीन गडकरी त्या व्यासपीठावर होते, पण या लोकांनी आपल्या भाषणात यावर बोलायला पाहिजे होतं. मी कोश्यारी यांच्या विरोधात नाही, पण मी त्या प्रवृत्तीच्या विरोधात आहे, असं देखील यावेळी उदयनराजे म्हणाले. तसेच यापुढे अवमान करायचा कोणी प्रयत्न केला तर त्याला नेस्तनाबूत करू. ही विकृती छाटून फेकून दिली पाहिजे, असं देखील यावेळी उदयनराजे म्हणाले.
सगळ्या नेत्यांनी भूमिका स्पष्ट केली पाहिजे - यावेळी उदयनराजे यांना उपमुख्यमंत्री देवेंद्र फडणवीस यांनी जाहीर केलेल्या भूमिकेबाबत विचारलं असता ते म्हणाले की सगळ्या नेत्यांनी भूमिका स्पष्ट केली पाहिजे. पक्ष काहीही असो, मी भाजपचा म्हणून आलेलो नाही. मी एक शिवभक्त म्हणून आलो आहे. सरकार कोश्यारी यांच्यावर कारवाई काय करतात हे बघेन आणि त्यानंतर २८ नोव्हेंबरला स्पष्ट करेन, असं देखील यावेळी उदयनराजे म्हणाले.
