पुणे Sanjay Raut on Ram Temple : सध्या देशभरात राम मंदिराच्या उद्घाटनाच्या सोहळ्याची चर्चा सुरु आहे. यावरुन भाजपा आणि विरोधकांमध्ये आरोप -प्रत्यारोप सुरु आहेत. अशातच शिवसेना उद्धव ठाकरे गटाचे खासदार संजय राऊत यांनी राम मंदिरावरुन भाजपा आणि केंद्र सरकारवर जोरदार निशाणा साधलाय. ते आज सकाळी पुण्यात पत्रकारांशी संवाद साधत होते.
राम मंदिराचं मंगल कार्यालय केलं : यावेळी बोलताना संजय राऊत म्हणाले की, "राम मंदिराचा सोहळा हा देशवासियांसाठी आनंदाचा क्षण आहे. त्यासाठी आमच्या लोकांनी बलिदान दिलंय. सध्या राम मंदिराचा सोहळा फक्त भाजपाचा झालाय. मात्र हा सोहळा देशाचा व्हायला हवा. हा फक्त धार्मिक सोहळा नसून देशाचा सांस्कृतिक सोहळा आहे. मात्र भाजपानं याला राजकीय सोहळा करुन ठेवलंय. स्वतःच्या घरातील मुंज, लग्नाचं जसं आमंत्रण देतात, तसंच भाजपाचे लोक आमंत्रण देत आहेत. जसं काय राम मंदिराचं यांनी मंगल कार्यालय करुन ठेवलंय. प्रभू श्रीराम सर्व पाहत आहेत. हा राजकीय सोहळा झाल्यावर आम्ही पाहू. राम मंदिरासाठी असंख्य शिवसैनिकांनी त्याग केलाय. त्याला आम्हाला आता कोणतंही गालबोट लावायचं नाही. पण योग्यवेळी आम्ही बोलू," असा इशारा राऊतांनी भाजपाला दिलाय.
या सरकारच्या काळात 17 प्रकल्प गुजरातमध्ये गेले : महाराष्ट्रातील प्रकल्प गुजरातमध्ये जात असल्यावरुनही संजय राऊत यांनी भाष्य केलंय. सिंधुदुर्गातील पाणबुडी प्रकल्प नुकताच गुजरातला गेला या विषयावर बोलताना राऊत म्हणाले, "सिंधुदुर्गमधील पाणबुडी प्रकल्प, टेस्ला, हिरे बाजार असे 17 प्रकल्प या सरकारच्या काळात गुजरातमध्ये गेले आहेत. सगळे प्रकल्प जबरदस्तीनं खेचून नेले आहेत. गुजरातसाठी केंद्र सरकारची वाटमारी सुरु असून यासाठी दहशतवादाचा गुन्हा दाखल केला पाहिजे. यावर मोदी भक्त, हिंदुत्ववादी राज्य सरकारला एक शब्दही बोलता येत नाही. यापेक्षा गुजरातला सोन्यानं मढवा, त्याची द्वारका करा, आमचं काही म्हणणं नाही. पण त्यासाठी आमच्या महाराष्ट्राच्या तोंडचा घास का हिरावताय?" असा प्रश्न संजय राऊतांनी उपस्थित केलाय.
हेही वाचा :
