पुणे - पत्नीला व्हॉटसअ‌ॅपवर मॅसेज पाठवत असल्याच्या कारणावरून स्केटींग प्रशिक्षकाचा धारदार शस्त्राने खून केल्याची घटना बुधवारी सकाळी हिंजवडीच्या मारुंजी भागात घडली आहे. निलेश शिवाजी नाईक (वय २४) असे खून झालेल्या स्केटिंग प्रशिक्षकाचे नाव आहे. याप्रकरणी एकाला हिंजवडी पोलिसांनी अटक केली असून मृत निलेश हा आरोपीच्या पत्नीला व्हॉटसअ‌ॅपवर मॅसेज पाठवत असल्याने त्याचा खून केल्याची कबुली आरोपीने दिली आहे.
हेही वाचा - पतीकडून पत्नीच्या प्रियकरावर कोयत्याने वार, अनैतिक संबंधातून खून केल्याचा संशय
विठ्ठल मानमोडे असे अटक करण्यात आलेल्या आरोपीचे नाव असून कपिल भूपाल नाईक यांनी हिंजवडी पोलीस ठाण्यात या घटनेची तक्रार दिली होती. पोलिसांनी दिलेल्या माहितीनुसार, बुधवारी सकाळी मारुंजीत स्केटिंग प्रशिक्षक नाईक यांचा धारदार शस्त्राने वार करून खून झाल्याची घटना उघडकीस आली होती. दरम्यान, हा खून मृत निलेशच्या मित्रानेच केल्याचे उघड झाले आहे. मृत निलेश आणि आरोपी विठ्ठल हे दोघे मित्र होते. दोघे ही एकाच परिसरात राहत असल्याने दोघांचे एकमेकांच्या घरी येणे जाणे होते. मानमोडे याच्यावर खुनाचा प्रयत्न आणि इतर एक गुन्हा दाखल झाला आहे.
हेही वाचा - संतापजनक.. नवविवाहितेच्या अंगावर रॉकेल ओतून जिवंत जाळले; पती,सासूला अटक
निलेश हा आरोपी विठ्ठल याच्या पत्नीला व्हॉटसअ‌ॅपवर मॅसेज करत होता. हे आरोपीला समजल्यामुळे त्याने निलेशला रात्री उशिरा मारुंजी परिसरात नेऊन दारू पाजली आणि शुद्ध हरपताच निलेशच्या मानेवर, गळ्यावर आणि डोक्यात वार करून त्याचा खून केला. त्यानंतर आरोपी विठ्ठलने तेथून पोबारा करत नवी मुंबई गाठली. हिंजवडी पोलिसांनी तपासाची चक्रे फिरवताच आरोपी हा नवी मुंबई येथे असल्याची खात्री झाली. सहायक पोलीस निरीक्षक अनिरुद्ध गिझे यांच्या पथकाने आरोपीला ताब्यात घेतले. त्याच्याकडे अधिक चौकशी केली असता निलेश आपल्या पत्नीला व्हॉटसअ‌ॅपवर मसेज करत असल्याच्या कारणावरून खून केल्याची कबुली आरोपीने दिली.
हेही वाचा - ३ वर्षाच्या मुलामुळे उघड झाले आईच्या मृत्यूचे रहस्य
दरम्यान, निलेश याने आरोपीच्या पत्नीला काय मॅसेज केले आहेत, हे समजू शकलेले नाही. पोलिसांनी महिलेची बदनामी होऊ नये यासाठी मॅसेज सांगण्यास नकार दिला आहे. घटनेचा अधिक तपास सहाय्यक पोलीस निरीक्षक उद्धव खाडे हे करत आहेत.
