पुणे - जुन्नर तालुक्यात प्राचीन काळीन लेण्या मोठ्या प्रमाणात आहेत. या लेण्यांमधील बौद्ध लेण्यांच्या अभ्यास करण्यासाठी राज्यभरातील लेणी अभ्यासकांनी शुक्रवारी याठिकाणी भेट देऊन माहिती घेतली. यावेळी परिसरात एक कार्यशाळाही आयोजित करण्यात आली होती. या कार्यशाळेत सुमारे ५० लेणी अभ्यासकांनी सहभाग घेतला होता.
कार्यशाळेसाठी लेण्यांचा अभ्यास करण्यासाठी आणि बुद्ध वारसा जाणून घेण्यासाठी महाराष्ट्रातून लेणी संवर्धक अभ्यासक उपस्थित होते. यावेळी पाली भाषा आणि लेणी अभ्यासकांनी लेण्यांविषयी आणि लेण्यांमध्ये लिहिलेल्या शिलालेखांविषयी सविस्तर माहिती दिली. लेण्यांमधील शिलालेख आणि तेथे असणाऱ्या लिपीचे वाचन केले.
अभ्यासकांनी जुन्नर जवळील लेण्याद्रीच्या बाजूला असणाऱ्या सुलेमान टेकडी वरील बुद्धलेणी तसेच चैत्यगृहाच्या कमानीची माहिती घेतली. जुन्नर मधील मानमोडी टेकडी, अंबाअंबिका, भीमाशंकर लेणी, भूतलेणी या लेण्यांचा इतिहास तसेच येथील शिलालेखांचाही अभ्यास केला. अभ्यासासाठी आलेले लेणी अभ्यासक आणि संवर्धक हे धम्मलिपीचे जाणकार असल्यामुळे त्यांनी शिलालेखांचा अभ्यास करून याबाबत माहिती दिली.
