पुणे - शनिवार पेठ भागात जोशी संकुल नावाच्या रहिवासी इमारतीला आज सकाळी आग लागली. प्रभात टॉकीजजवळ असलेल्या गल्लीत ही इमारत आहे. हा सर्व दाटीवाटीचा रहिवासी भाग असल्याने आग लागताच एकच खळबळ उडाली. आगीची माहिती मिळताच अग्निशमन दलाच्या ७ गाड्या घटनास्थळी दाखल झाल्या आणि आग विझवण्याचे काम सुरू केले.
अग्निशमन दलाच्या जवानांनी तातडीने आगीवर नियंत्रण मिळवत आग विझवली, मात्र इमारतीत मोठ्या प्रमाणात धूर झाल्याने काही नागरिक इमारतीच्या गच्चीवर अडकले होते. या सर्वांची अग्निशमन दलाच्या जवानांनी सुखरूप सुटका केली आहे. या पाच मजली इमारतीत एकूण २० फ्लॅट आहेत. या घटनेनंतर २३ नागरिकांना अग्निशमन दलाच्या जवानांनी सुखरूप बाहेर काढले.
या इमारतीच्या पहिल्या मजल्यावर आग लागली होती. अजूनही इमारत परिसरात मोठ्या प्रमाणात धूर आहे. आग कशामुळे लागली याचा तपास अग्निशमन दलाकडून करण्यात येत असून सुदैवाने आगीत कुठलीही जीवित हानी झालेली नाही.
