Santosh Shinde : वारकऱ्यांवरील लाठीचार्जवरून मुख्यमंत्र्यांना इशारा, संभाजी ब्रिगेडच्या संतोष शिंदे विरोधात गुन्हा दाखल

मुख्यमंत्री आणि उपमुख्यमंत्र्यांनी वारकऱ्यांची माफी मागावी, अन्यथा पंढरपूर येथील शासकीय पूजा होऊ देणार नाही, असा इशारा देणाऱ्या संतोष शिंदे विरोधात गुन्हा दाखल करण्यात आला आहे. पोलिसांनी संतोष शिंदे यांचे विधान दंगल घडवून आणणारे आहे, असे म्हटले आहे.

पुणे : आळंदी येथे संत ज्ञानेश्वरांच्या पालखी प्रस्थानाच्या वेळी काही वारकर्‍यांवर पोलिसांनी लाठीचार्ज केल्याची घटना घडली होती. या घटनेचा व्हिडिओ सोशल मीडियावर तुफान व्हायरल झाला होता. त्यावरून समस्त वारकरी समाजाने नाराजी व्यक्त केली होती. त्यानंतर संभाजी ब्रिगेडचे प्रदेश संघटक संतोष शिंदे यांनी फेसबुकवर एक व्हिडिओ पोस्ट केला होता. या व्हिडिओत त्यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी समस्त वारकरी समाजाची माफी मागावी, अन्यथा पंढरपूर येथील शासकीय पूजा होऊ देणार नाही, असा इशारा दिला होता. या प्रकरणी आता सहकारनगर पोलीस स्टेशनमध्ये संतोष शिंदे यांच्या विरोधात गुन्हा दाखल करण्यात आला आहे. या प्रकरणी तुषार दामगुडे यांनी फिर्याद दिली आहे.

'संतोष शिंदे यांचे विधान दंगल घडवून आणणारे' : या प्रकरणी पोलीस म्हणाले की, संतोष शिंदे यांचे हे विधान दंगल घडवून आणणारे आहे. तसेच लाखों भाविकांच्या मनात असुरक्षिततेची भावना निर्माण करणारे आहे. त्यामुळे कायदा सुव्यवस्थेचा प्रश्न निर्माण होऊ शकतो. या तक्रारीच्या आधारे संतोष शिंदे विरोधात गुन्हा दाखल करण्यात आला असून अधिक तपास सुरू असल्याचे सहकारनगर पोलिसांनी सांगितले.

ज्ञानेश्वरांच्या पालखीदरम्यान झाला होता लाठीचार्ज : आषाढी वारीनिमित्त संत ज्ञानेश्वर महाराजांच्या पालखीने 11 जून रोजी आळंदीहून पंढरपूरकडे प्रस्थान केले. मात्र पालखीच्या या सोहळ्यादरम्यान दुपारच्या वेळेस मंदिरात प्रवेशासाठी आलेल्या वारकऱ्यांवर पोलिसांनी लाठीचार्ज केला. यावरून विरोधी पक्षाच्या नेत्यांनी सरकारवर जोरदार टीका केली होती. उद्धव गटाच्या नेत्या सुषमा अंधारे यांनी या घटनेवरून सरकारवर निशाणा साधत घडलेला प्रकार अत्यंत निंदनीय असल्याचे म्हटले. तर राष्ट्रवादी कॉंग्रेसचे नेते छगन भुजबळ यांनी हा प्रकार म्हणजे वारकऱ्यांचा अपमान आहे, अशी प्रतिक्रिया दिली.

हे ही वाचा :