पुणे - दुष्काळी परिस्थितीचा सामना करणारा बळीराजा मेटाकुटीला आला आहे. त्यातच मान्सुनही लांबला आहे. ज्यांच्याकडे थोडेफार पाणी उपलब्ध आहे त्यावर काटकसरत करत भाजीपाला, तरकारी अशी पिके शेतकरी घेत आहेत. मात्र, कमी उत्पादनामुळे शेतकऱ्यांच्या मालास मिळणारा बाजारभाव तेजीत आहे. त्यामुळे शेतकऱ्यांना दिलासा मिळाला आहे.
सगळीकडे पाणी टंचाई असल्यामुळे भाजीपाल्याचे दर कडाडले आहेत. पाणी टंचाई असल्यामुळे नालाची आवक देखील कमी आहे. उत्तर पुणे जिल्ह्यातील मंचर बाजार समितीत पालेभाज्यांची सर्वात मोठी बाजार समिती म्हणून ओळखली जाते. या बाजार समितीत मागील २ दिवसांपासून तरकारी मालासह, भाज्यांची आवक निम्म्याने घटली आहे. यामुळे उत्पादकांना यंदा वर्षातील उच्चांकी दर मिळत आहे.
टोमॅटो, मिरची आणि बिट उत्पादक तर चढ्या दरामुळे खुश आहेत. बागायती पट्टा आणि भाजीपाला उत्पादकाचे आगार म्हणून ओळख असलेल्या उत्तर पुणे जिल्ह्यातील आंबेगाव, खेड, जुन्नर परिसरातून मुंबई आणि पुणे परिसरात या बाजार समितीमधून सुमारे २० ते २५ प्रकारच्या भाज्या निर्यात होतात.
दरम्यान सध्या शेतकऱ्यांच्या मालाला मिळणाऱ्या चांगल्या बाजारभावामुळे शेतकरी सुखावला असला तरी शहरी भागातील नागरिकांच्या खिशाला चिमटा लागत आहे. शेतकऱयांना चांगले दर जरी मिळत असले तरी दुष्काळी परिस्थितीत शेतमाल जगवण्यासाठी वारेमाप खर्च आल्याचे शेतकऱ्यांनी सांगितले.
मंचर बाजार समितीमधील गुरुवारचे भाज्यांचे १० किलोचे दर पुढीलप्रमाणे
१) टोमॅटो - ४५० ते ६०० रुपये
२) कोबी- ४० ते १३० रुपये
३) फ्लावर-५० ते १५१ रुपये
४) वांगी-१०० ते ३०० रुपये
५) दुधी भोपळा -५०ते १६० रुपये
६) भेंडी-१०० ते ४०० रुपये
७) कारली-१५० ते ५०० रुपये
८) काकडी-६० ते २०० रुपये
९) हिरवी मिरची -२५० ते ७०० रुपये
१०) ढोबळी मिरची-१०० तर ४०० रुपये
११) गवार -१०० ते ४४० रुपये
१२) बिट -५० ते २२५ रुपये
१३) तोंडली -१९० तर ३५० रुपये
१४) चवळी -१०० ते ३५१ रुपये
१६) घेवडा -३०० ते ४०० रुपये
१७) भुईमूग शेंगा -२५० ते ४९० रुपये
१८) शेवगा - ४०० ते ४५० रुपये
१९) कैरी- ८० ते २५० रुपये
पालेभाज्या १०० जुडीचे दर (मोठा जुड्या पासून व्यापारी नंतर २ ते ३ जुड्या तयार करून विक्री करतात )
२०) कोथिंबीर - ४००० ते ९०००
२१) मेथी -२००० ते ४०००
२२) शेपू -१००० ते २३००
