बनावट दारू बनविणाऱ्यांवर कारखान्यावर पुणे राज्य उत्पादन शुल्क विभागाचा छापा

हिंजवडीमधील पांडव नगर येथील साखरे वस्ती येथे सुरू असलेल्या एका बनावट दारूच्या कारखान्यावर अचानक छापा टाकला. यावेळी राज्य उत्पादन शुल्क विभागाने लाखोंचा मुद्देमाल जप्त केला.

पुणे- राज्य उत्पादन शुल्क विभागाने मुळशीतील हिंजवडी परिसरातील एका बनावट दारू निर्मितीच्या कारखान्यावर छापा टाकून तब्बल दहा लाखाचा मुद्देमाल जप्त केला आहे. या कारखान्यात उच्च प्रतीच्या दारूच्या रिकाम्या बाटल्यांमध्ये बनावट दारू भरून त्या विकल्या जात होत्या. याप्रकरणी नाग्या डाया चावडा (37) याला ताब्यात घेण्यात आले आहे.

राज्य उत्पादन शुल्क विभागाचे निरीक्षक संतोष झगडे यांनी दिलेल्या माहितीनुसार, हिंजवडीतील पांडव नगरमध्ये बनावट दारूची विक्री होत असल्याची माहिती राज्य उत्पादन शुल्क विभागाला मिळाली होती. त्यानुसार एका पथकाने हिंजवडीमधील पांडव नगर येथील साखरे वस्ती सुरू असलेल्या एका बनावट दारूच्या कारखान्यावर छापा टाकला. यावेळी त्यांना आरोपी उच्च प्रतीच्या दारूच्या रिकाम्या बाटल्यांमध्ये बनावट दारू भरत असताना आढळला. या ठिकाणांहून राज्य उत्पादन शुल्क विभागाने घटनास्थळावरून उच्च प्रतीच्या विदेशी मद्याच्या भरलेल्या 115 बाटल्या, 300 रिकाम्या बाटल्या, 180 लेबल, 400 बॉटल कव्हर असा एकूण दहा लाख पंधरा हजाराचा मुद्देमाल जप्त केला आहे. आरोपी नाग्या डाया चावडा त्याला अटक करण्यात आली असून त्याच्याविरोधात महाराष्ट्र दारूबंदी कायद्यानुसार गुन्हा दाखल करण्यात आला आहे.