भीमाशंकरचा हिरवागार परिसर शुभ्र धबधब्यांनी नटला

भीमाशंकर अभयारण्य परिसरातील थंडगार वातावरण, डोंगर कपारीतून वाहणारे धबधबे, पांढऱ्या शुभ्र धुक्याची चादर पर्यटकांना भुरळ पाडत आहे. त्यामुळे या ठिकाणी पर्यटक निसर्ग सौंदर्याचा आनंद घेण्यासाठी गर्दी करत आहेत.

पुणे - बारा ज्योतिर्लिंगांपैकी एक असणारा भीमाशंकर अभयारण्य परिसर निसर्ग सौंदर्याने नटला आहे. डोंगर कपारीतून वाहणारे धबधबे पर्यटकांचे आकर्षण बनत चालले आहेत. सध्या श्रावण महिन्याची यात्राही सुरू झाली आहे. त्यामुळे बारा ज्योतिर्लिंगांपैकी एक असणाऱ्या भीमाशंकरला येणाऱ्या भाविकांसाठी हे धबधबे पर्वणी ठरत आहेत.

गेल्या पंधरा दिवसांपासून सुरू असलेल्या पावसामुळे भीमाशंकर अभयारण्य परिसर हिरवागार झाला आहे. या परिसरातील थंडगार वातावरण, डोंगर कपारीतून वाहणारे धबधबे, पांढऱ्या शुभ्र धुक्याची चादर पर्यटकांना भुरळ पाडत आहे. त्यामुळे या ठिकाणी पुणे-मुंबईसह राज्यातील अनेक पर्यटक येत आहेत.जमिनीवरील स्वर्ग पाहायचा असेल तर भीमाशंकर अभयारण्यात यायला हवे. हा परिसर मन प्रसन्न करून टाकणारा आहे, अशा भावना पर्यटक व्यक्त करत आहेत.