पुणे - देशाच्या स्वातंत्र्यलढ्यासाठी क्रांतीकारकांचे योगदान मोठे आहे. यातच भगतसिंग, सुखदेव आणि राजगुरू यांच्या कार्याची दखल जागतिक पातळीवर घेतली जात असताना बालभारतीच्या आठवीच्या अभ्यासक्रमात भगतसिंग व राजगुरु यांचा उल्लेख करत सुखदेव यांचे नाव वगळून कुर्बान हुसैन यांचे नाव घेण्यात आले. हुसैन यांच्या नावाला विरोध नाही. मात्र, सुखदेव यांचे नाव वगळणे गैर आहे, असे म्हणत हुतात्मा राजगुरुंच्या जन्मभूमीत संताप व्यक्त केला जात आहे.
बालभारतीच्या आठवीच्या मराठी पुस्तकात ज्येष्ठ लेखक यदुनाथ थत्ते यांच्या लेखनाच्या संदर्भातून 'माझ्या देशावर माझे प्रेम आहे' या पाठात शाळेतील प्रार्थनेच्या वेळी विद्यार्थी देशाची प्रार्थना करुन जात असताना तुमच्या देशावर प्रेम कसे, या विषयावरील संवादावर पाठ देण्यात आला आहे. या पाठाच्या शेवटी म्हटले की, 'देशावर प्रेम करायचे तर भूमी व भूमीपुत्रांवर प्रेम करायला हवे', असे मत व्यक्त केले आहे. त्यावर मुलांनी 'भगतसिंग, राजगुरु व कुर्बान हुसैन हसत हसत फासावर गेल्याचे म्हटले आहे. यावर आता हुतात्मा राजगुरुंच्या जन्मभुमीतूनच विरोध होऊ लागला आहे. देशप्रेमासाठी भगतसिंग, सुखदेव आणि राजगुरु या तिघांना इंग्रजांनी एकत्रित फाशी दिली, तर सुखदेव यांचे नाव वगळून हुसैन यांचे नाव पाठ्यपुस्तकात देऊन इतिहासांबरोबर यातून छेडछाड केली जात असल्याचे मत राजगुरुप्रेमींनी व्यक्त केले आहे.
सोलापूरच्या चार हुतात्म्यांपैकी एक कुर्बान हुसेन -
कुर्बान हुसैन हे सोलापूर येथील स्वातंत्र्य सैनिक आणि पत्रकार होते. त्यांनी स्वातंत्र्य चळवळीत भाग घेतल्याच्या आरोपावरुन त्यांनाही वयाच्या २२ व्या वर्षीच इंग्रज सरकारने फाशी दिली होती. त्यांच्या नावाने सोलापूरमधे व्याख्यानमाला चालते. राजगुरु, भगतसिंग आणि सुखदेव हे वेगवेगळे जरी असले तरी आपल्या मनात या तिन्ही स्वातंत्र्य सैनिकांबद्दल पूर्ण आदर आहे. हुसैन यांच्या नावाला आक्षेप नाही पण भगतसिंग आणि राजगुरु यांच्यासमवेत सुखदेव यांचेही नाव त्यात सामील करावे आणि कुर्बान हुसैनही असावेत, असे मत राजगुरुप्रेमींनी व्यक्त केले आहे. बालभारतीने ही चूक तातडीने सुधारुन घ्यावी, अन्यथा तीव्र आंदोलन करू, असा इशारा राजगुरुप्रेमींनी दिला आहे.
