पुणे - पिंपरी-चिंचवड शहरातील एटीएम फोडणाऱ्या गुन्हेगारांना गुन्हे शाखा युनिट 1 च्या अधिकारी आणि कर्मचारी यांनी अटक केली आहे. त्यांच्याकडून एकूण 7 लाख 49 हजार रुपयांचा मुद्देमाल हस्तगत केला आहे. यात 1 लाख 40 हजार रुपये रोख रकमेचा समावेश आहे. अजयसिंग अर्जुनसिंग दुधानी (20) आणि शेऱ्या उर्फ श्रीकांत विनोद धोत्रे (23ः) यांसह एका अल्पवयीन मुलाला पोलिसांनी ताब्यात घेतले आहे. दरम्यान, सीसीटीव्ही क‌ॅमेऱ्याच्या मदतीने आरोपींला पकडण्यात पोलिसांना यश आले आहे.
पोलिसांनी दिलेल्या माहितीनुसार, 9 जूनला मध्यरात्री अज्ञात 5 जणांच्या टोळक्याने निगडी परिसरातील एटीएम मोटारीच्या साहाय्याने दोर बांधून फोडले होते. त्यातील साडेपाच लाख रुपये रक्कम काढून घेत हे एटीएम मुळा-मुठा नदीपात्रात फेकून दिले आणि आरोपींनी पोबारा केला. गुन्हे शाखेच्या युनिट 1 च्या अधिकारी आणि कर्मचारी यांनी सीसीटीव्ही क‌ॅमेऱ्यात कैद झालेल्या फुटेजच्या आधारे आरोपींना पकडले.
हेही वाचा... महागाईचा भडका..! पेट्रोल-डिझेल दरात पुन्हा वाढ, जाणून घ्या आजचे दर
पोलिसांनी यासाठी दीडशे आरोपींची चौकशी केली असून यातील अजयसिंग हा आरोपी सराईत गुन्हेगार आहे. संबंधित आरोपींना मोठ्या शिताफीने हडपसर येथून ताब्यात घेण्यात आले. आणखी काही गुन्हे उघडकीस येतील का, या दिशेने तपास सुरू आहे. दरम्यान, अद्याप दोन आरोपी फरार असून त्यांचाही शोध घेतला जात आहे.
सदरची कारवाई वरिष्ठ पोलीस निरीक्षक उत्तम तांगडे, सहाय्यक पोलीस निरीक्षक गणेश पाटील, सतिश कांबळे, पोलीस कर्मचारी रविंद्र गावंडे, प्रमोद लांडे, सोमनाथ बोन्हाडे, अमित गायकवाड व पथकातील इतर अधिकारी आणि सहकारी यांनी मिळून केली आहे.
