चपलीवरून आरोपींचा शोध; एटीएममधून 15 लाख घेऊन पसार झालेले जेरबंद

एटीएम फोडून 15 लाखांपेक्षा अधिक रक्कम चोरून पळून जाणाऱ्या चोरट्यांना भोसरी पोलिसांनी अटक केली आहे. विशेष म्हणजे आरोपींपर्यंत पोहोचण्यासाठी पोलिसांना त्यांच्या चप्पलेची मदत झाली आणि आरोपींना बेड्या ठोकण्यात आल्या. या एटीएम फोडीच्या घटनेत बँक कॅशिअर आणि इतर एका कर्मचाऱ्याचा समावेश होता.

पिंपरी-चिंचवड - पिंपरी-चिंचवडमध्ये एटीएम फोडून 15 लाखांपेक्षा अधिक रक्कम चोरून पळून जाणाऱ्या चोरट्यांना भोसरी पोलिसांनी अटक केली आहे. विशेष म्हणजे आरोपींपर्यंत पोहोचण्यासाठी पोलिसांना त्यांच्या चप्पलेची मदत झाली आणि आरोपींना बेड्या ठोकण्यात आल्या. या एटीएम फोडीच्या घटनेत बँक कॅशिअर आणि इतर एका कर्मचाऱ्याचा समावेश होता, असे पोलीस तपासात समोर आले आहे. मुख्य आरोपी हा रोहित काटे असून तो सेवा विकास को-ऑपरेटिव्ह बँकेत कॅशिअर आहे. तर, रोहित महादेव गुंजाळ हा देखील त्याच बँकेत काम करत होता. या दोघांसह आनंद चंद्रकांत मोरे आणि सचिन शिवाजी सुर्वे असे अटक करण्यात आलेल्या आरोपींची नावे आहेत.

15 लाख घेऊन पसार -

पोलिसांनी दिलेल्या माहितीनुसार, भोसरीमध्ये असलेल्या सेवा विकास को-ऑपरेटिव्ह बँकेत रोहित काटे हा कॅशिअर असून त्याच्यासोबत रोहित गुंजाळ हा देखील काम करतो. दरम्यान या दोघांनी बँकेच्या शेजारी असणारे एटीएम लुटायचे असा प्लॅन केला. त्यानुसार, त्यांनी इतर दोघांची मदत घेतली. पैकी, आनंद चंद्रकांत मोरे ला एटीएमच्या लॉकर ची बनावट चावी आणि पासवर्ड सांगितला होता. ठरल्याप्रमाणे सचिन आणि आनंद यांनी मध्यरात्री एटीएममध्ये जाऊन कोणतीही तोडफोड न करता एटीएममधून तब्बल 15 लाख रक्कम घेऊन पळ काढला.

चपलेच्या आधारे तपास -

या घटनेची माहिती मिळताच भोसरी पोलिसांनी घटनास्थळी धाव घेत तपास सुरू केला. चोरीची घटना सीसीटीव्हीमध्ये कैद झाली. त्याचा आधार घेऊन एका आरोपीने चप्पल घातल्याचे निदर्शनास आले. त्यावरून आणि चोरीची मोडस पाहुन बँकेतील कर्मचारी यात सहभागी असण्याची शक्यता पोलिसांनी वर्तवली. बँकेतील कर्मचाऱ्यांची विचारपूस करत असताना बँकेतील कर्मचारी रोहित गुंजाळ याचा मोबाईल तपासण्यात आला. त्यात सीसीटीव्हीमध्ये कैद झालेल्या चोरट्याने घातलेली चप्पल तसाच फोटो त्यात असल्याने तातडीने त्या व्यक्तीला म्हणजेच आनंदला ताब्यात घेण्यात आले. पोलिसांना त्याने सर्व घटना सांगितली. त्यानुसार एकूण चार जणांना बेड्या ठोकण्यात आल्या आहेत.

ही कामगिरी पोलीस आयुक्त कृष्ण प्रकाश, अप्पर पोलीस आयुक्त रामनाथ पोकळे, पोलीस उपायुक्त मंचक इप्पर, सहाय्यक पोलीस आयुक्त सागर कवडे, वरिष्ठ पोलीस निरीक्षक शंकर अवताडे, गुन्हे पोलीस निरीक्षक जितेंद्र कदम यांच्या मार्गदर्शनाखाली पोलीस उपनिरीक्षक गोविंद पवार, बोयने, विनायक म्हसकर, गणेश हिंगे, बाळासाहेब विधाते, आशिष गोपी, सागर भोसले, सुमित देवकर, समीर रासकर, गणेश सावंत, वीर यांच्या पथकाने केली आहे.