पुणे (दौंड) : शिरुर-सुपा रस्त्यावर अज्ञात वाहनाच्या धडकेत पंजाब येथील गहू मशीन चालकाचा मृत्यू झाला. दौंड तालुक्यातील पडवी गावाच्या हद्दीत ही घटना घडली आहे. बलदेव बलविर सिंग, असे या व्यक्तीचे नाव आहे.
उपचारापूर्वीच मृत्यू -
बलदेव बलविर सिंग यांच्या दुचाकीला अज्ञात वाहनाने जोरात धडक दिली. या अपघातात बलदेव सिंग यांच्या डोक्याला गंभीर दुखापत झाली. त्यांना उपचारासाठी बोरिपारधी येथील खासगी रूग्णालयात नेण्यात आले. त्याठिकाणावरून त्यांना पुढील उपचारासाठी यवत येथील ग्रामीण रुग्णालयात दाखल केले गेले. मात्र, बलदेव बलविर सिंग यांचा उपचारपूर्वीच मृत्यू झाला.
अज्ञात वाहन चालकावर गुन्हा दाखल -
मृत व्यक्तीचा भाऊ सुरेंद्र बलविर सिंग यांनी यवत पोलिसात अज्ञात वाहनचालकाविरोधात तक्रार दिली. रात्री ८ वाजण्याच्या सुमारास पडवी (ता.दौंड) हद्दीतील पेट्रोल पंपाजवळ शिरूर-सुपा रस्त्यावर एका अज्ञात वाहन चालकाने बलदेव बलविर सिंग (वय-३४ वर्षे) (सध्या राहणार सुपा ता-बारामती, मुळगाव-पंजाब) यांच्या वाहनाला धडक दिली. यात त्यांचा मृत्यू झाला, असे तक्रारीत म्हटले आहे.या घटनेचा पुढील तपास सहाय्यक फौजदार सागर चव्हाण करत आहेत.
