पुणे - कोरेगाव पार्क परिसरातील वाटसरुंनी काल चित्तथरारक अपघात अनुभवला. घोडागाडीचे घोडे बिथरुन रस्त्यावर सुसाट वेगाने धावत होते. या गाडीला अडवण्याचा प्रयत्न घोडागाडीचा मालक करत होता. या प्रयत्नात घोडा आणि मालक दोघेही जखमी झाले. या प्रसंगाचे चित्रीकरण घटनास्थळावरुन केले गेले. हा थरार व्हिडिओच्या माध्यमातून समोर आला आहे.
पुण्यातल्या कोरेगाव पार्कातील कल्याणी नगर भागात एक घोडागाडी जात होती. त्या परिसरातील एका लग्नात मिरवणुकीसाठी ती वापरली जाणार होती. विद्युत रोषणाई केलेल्या या गाडीत कुणीही चालक बसलेला नव्हता. अचानक गाडीचे घोडे बिथरले आणि सुसाट धावू लागले. भररस्त्यात धावणारे घोडे कुण्या गाडीला धडकून अपघात होण्याची शक्यता होती. त्यामुळे गाडीमालक मोटारसायकलवर स्वार होऊन घोड्यांना थांबवण्यासाठी निघाला.
हेही वाचा - महिलेला पोलिसांचा धक्कादायक सल्ला; ‘तो’ पुन्हा तुमच्याकडे आल्यावर बोलवा! मग कारवाई करू
घोडागाडीचा पाठलाग करत मोटारसायकलने गाडी गाठली. मागे बसलेल्या मालकाने घोड्याच्या वेसणीला हात घालून त्याला थांबवण्याचा प्रयत्न केला. तो थांबला आहे असे वाटताच अडखळून खाली कोसळला. या बरोबरच मालक सुद्धा मोटारसायकलवरुन खाली कोसळला आणि घोडागाडीच्या चाकाखाली आला. गाडीची दोन्ही चाके मालकाच्या अंगावरुन गेली. पुढे काही अंतरावर जाऊन घोडे थांबले. पण, यात घोडा आणि मालक दोघेही जखमी झाले आहेत.
