पुणे - अभिनेता आणि दिग्दर्शक महेश मांजरेकर यांच्यावर एका व्यक्तीला मारहाण केल्याचा आरोप ठेवण्यात आला आहे. मांजरेकर यांच्या गाडीला पाठीमागून धक्का दिल्याने निर्माण झालेल्या वादातून मांजरेकरांनी मारहाण केली, असा आरोप संबंधित व्यक्तीने केला आहे. हा प्रकार शुक्रवारी रात्री पुणे-सोलापूर महामार्गावर घडला. मांजरेकर यांच्या गाडीला पाठीमागून एका चारचाकी वाहनाने धडक दिली. कैलास सातपुते नावाच्या एका तरुणाने यवत पोलीस ठाण्यामध्ये तक्रार दिली असून मांजरेकर यांच्याविरोधात अदखलपात्र गुन्हा दाखल करण्यात आला आहे.
गालावर चापट मारल्याचा आरोप -
गाडीला धडक बसल्यानंतर मांजरेकरांनी खाली उतरून गाडीची पाहणी केली. यावेळी त्यांचा फिर्यादीसोबत वाद झाला. त्यानंतर मांजरेकर यांनी शिवीगाळ करत आपल्याला मारहाण केली असल्याचा आरोप फिर्यादीने केला आहे. या प्रकरणाचा एक व्हिडिओ समोर आला आहे. या व्हिडिओमध्ये महेश मांजरेकर त्या तरुणाला 'तू दारू पिऊन गाडी चालवतोस का?' असे विचारताना दिसतात.
महेश मांजरेकर हे कारने सोलापूर रस्त्याने जात असताना त्यांनी अचानक ब्रेक लावल्यामुळे माझी गाडी त्यांच्या गाडीला जाऊन धडकली. यामध्ये त्यांच्या गाडीचे किरकोळ नुकसान झाले आहे. या कारणावरून महेश मांजरेकर यांनी शिवीगाळ करत गालावर चापट मारली, असल्याचे कैलास सातपुते यांनी फिर्यादीत म्हटले आहे.
