परभणी - भाजप सरकारने मराठवाड्याच्या सिंचनाचा प्रश्न मिटवण्यासाठी 25 हजार कोटी रुपयांची मराठवाडा वॉटर ग्रीड योजना आणली होती. मात्र, या सरकारने राजकीय द्वेषापोटी ही योजनाच रद्द केली. ज्या मराठवाड्याने शिवसेनेला भरभरून दिले, त्याच मराठवाड्याच्या योजनेचे त्यांनी काय केले, असा सवाल विधानपरिषदेचे विरोधी पक्षनेते प्रवीण दरेकर यांनी आज (दि. 4 ऑक्टो) परभणीत उपस्थित केला. तसेच दुसरी अतिवृष्टी आली तरी या सरकारची मदत शेतकऱ्यांना मिळालेली नाही, असा टोला देखील त्यांनी लगावला.
सप्टेंबर महिन्यात झालेल्या अतिवृष्टीमुळे परभणीसह मराठवाड्यातील अनेक जिल्ह्यांमध्ये पिकांचे प्रचंड नुकसान झाले आहे. या नुकसानीची पाहणी करण्यासाठी विरोधी पक्षनेते प्रवीण दरेकर जिल्हा दौर्‍यावर आले आहेत. रविवारी संध्याकाळी 7 वाजता त्यांनी सावली विश्रामगृहावर यासंदर्भात पत्रकारांना माहिती दिली.
ते म्हणाले, परभणीसह आजूबाजूच्या सर्व जिल्ह्यांमध्ये अतिवृष्टीमुळे पिकांची मोठी हानी झाली आहे. सप्टेंबर महिन्यात परभणी जिल्ह्यात तब्बल 268 मिलिमीटर पाऊस पडल्याने शेती बाधित झाली आहे. त्यामुळे सरकारने शेतकऱ्यांना तात्काळ मदत करणे आवश्यक आहे. मात्र, 40 टक्केही पिककर्ज वाटप झाले नाही. पीक विमा देखील भेटला नाही. शेतकऱ्यांना कुठलीच मदत मिळत नाही. चार महिने झाले, शेतकऱ्यांना दमडी देखील या सरकारने दिलेली नाही, असा आरोप दरेकर यांनी केला आहे.
तसेच पाहणी दरम्यान सर्वत्र विदारक चित्र दिसले असून, सरकारने सरसकट पंचनामे करून बागायतदारांना 50 हजार तर कोरडवाहू शेतीसाठी 25 हजार रुपये एकरी मदत तात्काळ द्यावी, अशी मागणी देखील त्यांनी केली आहे. अनेक शेतकऱ्यांना ऑनलाइन फॉर्म भरण्यात अडचणी येत आहेत. त्यामुळे विमा कंपनीने नुकसान भरपाईसाठी महसूलने केलेले पंचनामे गृहीत धरावेत, असेही त्यांनी म्हटले आहे.
दरम्यान, मंत्रालयात बसून सरकारला शेतकऱ्यांची व्यथा करणार नाही. मंत्र्यांनी बांधावर जाऊन पाहणी करणे आवश्यक आहे. मात्र, परभणीत येण्याऐवजी कृषी मंत्री दादा भुसे यांनी दुरूनच परभणी जिल्ह्याचा आढावा घेतला. त्यामुळे शेतकऱ्यांना या सरकारकडून मदत मिळणे अवघड असल्याचे ते म्हणाले. मात्र, शेतकऱ्यांना आठवडाभरात मदत व्हावी, अन्यथा विरोधी पक्ष म्हणून संपूर्ण राज्यात तीव्र आंदोलन छेडण्याचा इशारा देखील दरेकर यांनी दिला आहे.
भाजप सरकारच्या काळात जे शेतकऱ्यांचे पैसे थकले आहेत, ते आता आघाडी सरकारने सरकार म्हणून द्यायला हवेत, यासाठी आमचा पाठपुरावा सुरू आहे. तर आमचे सरकार असताना याच सत्ताधारी पक्षांच्या लोकांनी विमा कंपन्यांवर मोर्चे काढले. त्यांची कार्यालय फोडली. त्यावेळी विम्यासंदर्भात काही चुका झाल्या असतील तर त्या आता यांनी दूर कराव्यात. शेतकऱ्यांना तत्काळ मदत द्यायला हवी. मात्र, दुसरी अतिवृष्टी आली तरी या सरकारची मदत मिळालेली नाही. निवडणुकांपूर्वी त्यांनी शेतकऱ्यांना बांधावर जावून जोरदार आश्वासने दिली होती. त्यांनी दिलेले तेच वचन अद्यापही पूर्ण केलेले नाहीत, असेही दरेकर म्हणाले.
या पत्रकार परिषदेस आमदार मेघना बोर्डीकर, माजी आमदार मोहन फड, भाजप जिल्हाध्यक्ष डॉ. सुभाष कदम यांसह आदींची उपस्थिती होती.
हेही वाचा - गंगाखेड बस स्थानकजवळच्या उड्डाणपुलाला अडथळा ठरणाऱ्या 95 दुकानांवर तोडक कारवाई
