परभणी - कोरोनाच्या संकटात महाघाडीच्या सरकारने जनतेला वाऱ्यावर सोडल्याचा आरोप करत परभणी शहरात भाजपाच्या वतीने शुक्रवारी 'माझे आंगण माझे रणांगण' या मोहिमेअंतर्गत 'महाराष्ट्र बचाओ'चा नारा देण्यात आला. पाथरीच्या आमदार मेघना बोर्डीकर तसेच महानगर जिल्हाध्यक्ष आनंद भरोसे आणि माजी आमदार रामराव वडकुते यांच्यासह पदाधिकाऱ्यांनी तीन ठिकाणी हे आंदोलन करून ठाकरे सरकारचा निषेध नोंदवला.
आमदार मेघना बोर्डीकर यांच्या नेतृत्वात जिंतूर रोडवरील त्यांच्या संपर्क कार्यालयासमोर 'महाराष्ट्र बचाव आंदोलन' करण्यात आले. यावेळी ठाकरे सरकारचा निषेध करणारे फलक हातात घेऊन कार्यकर्ते या आंदोलनात सहभागी झाले होते. याशिवाय वसमत रोडवर झालेल्या आंदोलनात माजी आमदार रामराव वडकुते, प्रदेश सदस्य प्रमोद वाकोडकर, मोहन कुलकर्णी, रामकिशन रोंदले, भीमराव वायवळ, चंद्रकांत डहाळे, भालचंद्र गोरे आदी जण सहभागी झाले होते.
तसेच शहरात भाजप महानगर शाखेचे पदाधिकारी व कार्यकर्ते आपापल्या घरासमोर, चौकात, फिजिकल डिस्टन्सिंगचे पालन करत तोंडाला काळ्या फिती लावून, निषेध फलक हाती घेऊन आंदोलनात सहभागी झाले होते. या आंदोलनात भाजपा जिल्हाध्यक्ष आनंद भरोसे, संजय शेळके, विशाल बोबडे व महेंद्र वैरागर यांनीही सहभाग नोंदवला.
याप्रसंगी आनंद भरोसे म्हणाले, 'संपूर्ण देशामध्ये कोरोनाचे सर्वाधिक रुग्ण आणि सर्वाधिक मृत्यूदर याच्यामध्ये दुर्दैवाने महाराष्ट्राचा पहिला नंबर आहे. राज्य सरकारचा नाकर्तेपणा, राज्य सरकारच्या नेतृत्वाचे या सर्व गोष्टींकडे होत असलेलं अक्षम्य दुर्लक्ष याचमुळे आज महाराष्ट्राची, महाराष्ट्रातल्या जनतेची अशाप्रकारची दयनीय अवस्था झालेली आहे.'
हेही वाचा - आजपासून धावणार लालपरी; परभणी आगाराचा तात्पुरता आराखडा तयार
हेही वाचा - Corona : परभणीत चार नवे कोरोना पॉझिटिव्ह.. जिल्ह्यातील कोरोनाबाधितांचा आकडा 20 वर
