सात महिन्याच्या गर्भवती विवाहितेची आत्महत्या, पतीसह सासूवर आरोप सिद्ध

पूजा अमोल एडके असे या आत्महत्याग्रस्त महिलेचे नाव आहे. या विवाहितेने स्वत:ला पेटवून घेत आत्महत्या केल्याची घटना 5 फेब्रुवारी 2015रोजी रोजी घडली होती.

परभणी - घर बांधण्यासाठी माहेराहून 50 हजार रुपये आण म्हणून शारीरिक व मानसिक छळ केल्यामुळे 7 महिन्याच्या गर्भवती विवाहितेने आत्महत्या केली होती. या प्रकरणात सदर विवाहितेला आत्महत्या करण्यास प्रवृत्त केल्याचा आरोप सिद्ध झाल्याने पतीसह सासूला परभणी न्यायालयात शिक्षा सुनावण्यात आली आहे. ही घटना मानवत तालुक्यातील सावरगाव येथील असून, पाच वर्षापूर्वीच्या या खटल्याचा आज (मंगळवारी) न्यायालयाने निकाल दिला आहे.

पूजा अमोल एडके असे या आत्महत्याग्रस्त महिलेचे नाव आहे. या विवाहितेने स्वत:ला पेटवून घेत आत्महत्या केल्याची घटना 5 फेब्रुवारी 2015रोजी रोजी घडली होती. याबाबत मानवत पोलीस ठाण्यात मृत विवाहितेची आई रसिकाबाई सटवाजी ढवळे यांनी फिर्याद दिली होती.

चरित्र्यावरही घेत होते संशय

मयत पूजा हिचे लग्न अमोल भागोजी एडके (रा. सावरगाव, ता. मानवत, जि. परभणी) याच्यासोबत झाले होते. लग्नानंतर सासू कांताबाई भागोजी एडके व नवरा अमोल एडके यांनी घर बांधण्यासाठी माहेराहून 50 हजार आण म्हणून तिचा शारीरिक व मानसिक छळ करुन चारित्र्यावरदेखील संशय घेतला. ती 7 महिन्यांची गर्भवती असताना 5 फेब्रुवारी 2015रोजी सासरच्या राहत्या घरी पुजाने स्वत:ला पेटवून घेतल्याने ती जळून मरण पावली. त्यावरुन आरोपी कांताबाई भागोजी एडके (सासू) व अमोल एडके (नवरा) यांच्याविरुद्ध मानवत पोलीस ठाण्यात गुन्हा दाखल करण्यात आला होता.

7 साक्षीदारांची तपासणी

या प्रकरणाचे तत्कालीन तपासिक अंमलदार सहायक पोलीस निरीक्षक अविनाश खंदारे यांनी तपास करून न्यायालयात आरोपींविरुद्ध दोषारोपपत्र दाखल केले. हा खटला जिल्हा व सत्र न्यायालयाचे न्यायाधीश ए. एम. पाटील यांच्यासमोर चालला. सरकारतर्फे एकूण 7 साक्षीदार तपासण्यात आले. या प्रकरणात वैद्यकीय अहवाल व साक्षीदारांचे जबाब यावरुन आरोपीस दोषी ठरवण्यात आले.

प्रत्येकी 1 व 3 वर्षांची सक्तमजुरीची शिक्षा

त्यानुसार कलम 498'अ'मध्ये आरोपी अमोल एडके व कांताबाई एडके यांना प्रत्येकी 1 वर्षे सक्तमजुरी व कलम 306 भा. दं. वि.मध्ये दोन्ही आरोपींना 3 वर्षे सक्तमजुरी व 500 रुपये दंड, अशी शिक्षा सुनावली. तसेच दंड न भरल्यास 2 महिन्याची साधी कैद देण्यात येईल, असेही न्यायालयाने स्पष्ट केले. या प्रकरणात जिल्हा प्रमुख सरकारी अभियोक्ता अ‍ॅड. डी. यू. दराडे यांच्या मार्गदर्शनाखाली सहायक सरकारी अभियोक्ता अ‍ॅड.आनंद एन. गिराम यांनी सरकारतर्फे बाजू मांडली. तर पैरवी अधिकारी म्हणून पोलीस उपनिरीक्षक एस. व्ही. मनाळे व सहायक पोलीस उपनिरीक्षक सुरेश चव्हाण यांनी काम पाहिले.