परभणी - परभणी शहरात आज(गुरुवार) पुन्हा एकदा पावसाने हजेरी लावली. सकाळी सातच्या सुमारास १५ मिनिटे हा पाऊस पडला. दरम्यान, जिल्ह्यात इतर भागात मात्र कुठेच पाऊस झाला नाही. परंतु, येणाऱ्या काळात पावसाची शक्यता वर्तवण्यात आल्याने याचा फटका रब्बीच्या गहू, हरभरा, ज्वारी व इतर फळपिकांना बसू शकतो, म्हणून शेतकरी चिंतेत दिसून येत आहे.
परभणीत यापूर्वी २६ आणि ३१ डिसेंबरला अवकाळी पावसाने हजेरी लावली होती. त्यावेळी तब्बल तासभर पडलेल्या पावसामुळे शेतातील पिकांचे काही प्रमाणात नुकसान झाले होते. त्यानंतर पुन्हा आज सकाळी ७ वाजता शहरात पावसाने हजेरी लावली. यावेळी, केवळ १५ मिनिटे पाऊस पडल्यामुळे याचा धोका पिकांना बसला नाही. असे असले तरी मागच्या २ वेळेस पडलेल्या पावसामुळे शेतातील पिकांना काही प्रमाणात फटका बसला आहे. शिवाय येणाऱ्या काही दिवसात आणखी पाऊस पडण्याची शक्यता हवामान खात्याकडून वर्तवण्यात येत असल्याने शेतकऱ्यांच्या चिंतेत आणखी वाढ झाली आहे.
हेही वाचा - परभणीत पाण्याच्या कारखान्यावर छापा; 5 लाखांचा मुद्देमाल जप्त
दरम्यान, परभणीत सकाळी पाऊस पडल्यानंतर काही काळ ढग दाटून आले होते. परंतु, त्यानंतर पावसाळी वातावरण मोकळे होऊन कडक ऊन पडले आहे.
हेही वाचा - 8 दिवसांपासून गाव अंधारात; त्यात रोहित्रही जळाले
