परभणी - पालम शहरातून जाणाऱ्या राष्ट्रीय मार्गावरील संभाजीनगर जवळ कोळशाच्या ट्रकने अचानक पेट घेतल्याची घटना दुपारच्या सुमारास घडली. या आगीत ट्रक जळून खाक झाला असून, मोठे आर्थिक नुकसान झाले आहे.
संबंधित ट्रक गंगाखेडवरून पालमकडे वीटभट्टीसाठी लागणारा कोळसा घेऊन जात होता. पालमतील संभाजीनगरजवळ या ट्रकला अचानक आग लागली. आग लागल्याचे चालकाच्या लक्षात येताच त्याने प्रसंगावधान गाडी रस्त्याच्या बाजूला घेतली. यानंतर आगीने उग्ररूप धारण केल्याने संपूर्ण ट्रक जळून खाक झाला. संबंधित घटनेत कोणतीही जीवितहानी झाली नाही.
आगीचा मोठा भडका झाल्याने परिसरात ज्वाळा व धूर मोठ्या प्रमाणात पसरला होता. राष्ट्रीय मार्गावर ही घटना घडल्याने दोन्ही बाजूंनी वाहतुकीची कोंडी झाली होती. पालम पोलिसांनी घटनास्थळी दाखल होऊन पंचनामा केला आहे. सध्या आग लागण्यामागे कोणते कारण आहे याचा तपास सुरू आहे.
