पालघर - एसटी कर्मचाऱ्यांचे वेतन थकल्याने त्यांना आर्थिक संकटांचा सामना करावा लागत आहे. थकित वेतन लवकरात लवकर मिळावे, या मागणीसाठी महाराष्ट्र स्टेट ट्रान्सपोर्ट कामगार संघटनेच्यावतीने आज राज्यभर आंदोलन केले जात आहे. पालघर येथील महाराष्ट्र राज्य परिवहन महामंडळाच्या विभागीय कार्यालयात बाहेर कर्मचाऱ्यांनी आंदोलन कले. सोशल डिस्टन्स व कोरोना विषयीच्या अटी व शर्तींचे पालन करत हे आंदोलन करण्यात आले.
एसटी महामंडळाच्या कामगारांना जुलै, ऑगस्ट, सप्टेंबर या महिन्यांचे वेतन तीन महिन्यांचा कालावधी संपूनही अद्याप मिळालेले नाही. कोरोनाच्या काळात कामगारांनी वेतन मिळत नसतानाही आपला जीव धोक्यात घालून आपले कर्तव्य बजावले आहे. अशा परिस्थितीत कामगारांना कामाचा मोबदला म्हणून वेतन देणे, ही प्रशासनाची जबाबदारी आहे. परिणामी, प्रशासनाने कामगारांना तत्काळ थकीत वेतन देऊन त्यांच्यावरील आर्थिक संकट दूर करावे, या मागणीसाठी कर्मचाऱ्यांनी आत्मक्लेश आंदोलन केले.
