पालघर - मागील काही दिवसांपासून दडी मारलेल्या मारलेल्या पावसाने जोरदार पुनरागमन केलं. पालघर जिल्ह्यात मुसळधार पाऊस पडला. परिणामी नाले ओसंडून वाहत आहेत. अशात नाल्यात एक कार चालकासह वाहून चालली होती. तेव्हा तेथील स्थानिकांनी व रिक्षाचालकांनी प्रसंगावधान दाखवत कारचालकाच्या मदतीसाठी धाव घेतली आणि पाण्यात वाहून चाललेली कार, चालकासह पाण्यातून बाहेर काढली. या घटनेचा व्हिडिओ समोर आला आहे.
पालघर जिल्ह्यात चांगलाच पाऊस बरसला या पावसामुळे काही ठिकाणी सखल भागात पाणी साचले तर काही नाले ओसंडून वाहत होते. अशात केळवे रोड रेल्वे स्टेशनजवळ पुलाचे काम सुरू आहे. येथील पूर्वेकडून पश्चिमेकडे जाण्यासाठी यापूर्वी असलेल्या रेल्वे पुलाखालूनच जाण्यासाठी रस्ता आहे. मात्र पाऊस जोरात असल्याने येथील नाल्याला पूर आला. नाल्याला पूर आला असताना देखील एका कार चालकाने स्वतःचा जीव धोक्यात घालत कार पूराच्या पाण्यातून काढण्याचा प्रयत्न केला.
पाण्याचा प्रवाह जोरात असल्याने कार पाण्यासोबत वाहून जाऊ लागली. ही बाब तेथे असलेल्या रिक्षाचालक व स्थानिकांच्या लक्षात येताच त्यांनी घटनास्थळी धाव घेतली. कारला दोरीच्या सहाय्याने एका पिकअप टेम्पोला बांधले. त्यानंतर कारला ओढून कार, चालकासह सुखरूप पुराच्या पाण्यातून बाहेर काढली. दरम्यान, या घटनेचा व्हिडिओ समोर आला आहे. यात तेथील नागरिकांनी त्या कारला दोरीच्या साह्याने बांधली. त्यानंतर त्यांनी ती दोरी ओढत कारला बाहेर काढले. यावेळी काही नागरिक पाण्याच्या प्रवाहात उतरलेले असल्याचे पाहायला मिळाले.
हेही वाचा - अर्जुन पुरस्कार विजेत्या खेळाडूवर आली शेती करण्याची वेळ, महाराष्ट्रीयन असल्याने त्रास होत असल्याचा केला आरोप
हेही वाचा - योग्यवेळी निर्णय घेणार, समर्थकांची समजूत काढताना पंकजा मुंडेंचे सूचक वक्तव्य
