पालघर - वसईत आनंदी माने या महिलेने रागाच्या भरात आपल्या सुनेच्या डोक्यात फ्लावरपॉट मारल्याने तिचा जागीच मृत्यू झाल्याची धक्कादायक घटना समोर आली आहे. रिया माने, असे मृत महिलेचे नाव आहे. वसई पश्चिम येथील इस्कॉन इमारतीत ही घटना घडली. याप्रकरणी आरोपीने स्वत:च माणिकपूर पोलिसांना घटनेची माहिती दिली. त्यानंतर आरोपी महिलेला अटक करण्यात आली आहे.
आनंदी माने यांचा मुलगा रोहन कामानिमित्त अमेरिकेला असतो. सहा वर्षांपूर्वी त्याचे लग्न रियासोबत झाले होते. त्यांना सहा महिन्यांची एक मुलगीदेखील आहे. पंधरा दिवसांपूर्वीच ते अमेरिकेहून भारतात परत आले होते. आनंदी हिला सुन रिया आवडत नव्हती. मुलाला आपल्यापासून दूर करत असल्याचे म्हणत तिचे सतत रियासोबत भांडण व्हायचे. याच कारणावरून दोन दिवसांपूर्वी त्यांच्यात भांडण झाले होते.
हेही वाचा - रत्नागिरी: विवाहितेच्या मृत्यूप्रकरणी पोलिसांची भूमिका संशयास्पद; नातेवाईकांचा आरोप
मुलगा आणि पती घराबाहेर असताना आनंदीने रिया यांच्या डोक्यात फ्लॉवरपॉट मारला. त्यानंतर, आनंदी हिने स्वत:च माणिकपूर पोलीस ठाण्यात जाऊन सूनेला मारल्याचे सांगितले. पोलिसांनी त्वरीत घटनास्थळी धाव घेऊन घटनेची शहानिशा केली. आनंदी हिला सुन रियाच्या हत्येच्या आरोपाखाली अटक करण्यात आली आहे. रियाचा मृतदेह शवविच्छेदनासाठी पाठवला असल्याची माहिती वरिष्ठ पोलीस निरीक्षक राजेंद्र कांबळे यांनी दिली आहे.
