पालघर (वाडा) - वाडा बस स्थानकात बस चालक व वाहक महिला यांनी वृद्ध प्रवासी दाम्पत्याला बेदम मारहाण केल्याचा प्रकार समोर आला आहे. दरम्यान, या मारहाणीचा संपूर्ण प्रकार सीसीटीव्ही कॅमेरात कैद झाली आहे.
लाथाबूक्यांनी बेदम मारहाण
बोईसर-पैठण बस बोईसरहून वाड्याकडे जात असताना, हमरापूर फाटा येथे वयोवृद्ध पतीपत्नी या बसमध्ये बसले. बस वेगाने जात असल्याने, रस्त्यावर खड्डे अल्यास बस हळू चालवा असे या दाम्पत्याने सांगितले. याचा राग मनात धरून बोईसर बस डेपोतील चालक गोरखनाथ नागरगोजे आणि वाहक महिला शीतल पवार या दोघांनी वाडा बस स्थानकात या दोन वयोवृद्धांना बसमधून उतरल्यानंतर लाथाबूक्यांनी बेदम मारहाण केली. दरम्यान, या मारहाणीचा सर्व प्रकार सीसीटीव्ही कॅमेऱ्यात कैद झाली आहे.
वाडा पोलीस ठाण्यात तक्रार
बसमधून बाहेर पडल्यानंतर हे दांम्पत्य चालत चालले होते. यावेळी अचानक वाहक महिला या दाम्पत्याकडे गेली आणि यातील वृध्दाला पकडायला सुरूवात केली. त्यावेळी सोबत असलेल्या त्यांच्या वृद्ध पत्नीने विरोध केला, परंतु या वाहक महिलेने त्यांना मारहाण करण्यास सुरूवात केल्याचे सीसीटीव्ही कॅमेऱ्यात दिसत आहे. या प्रकरणी वृद्ध दांपत्याने वाडा पोलीस ठाण्यात मारहाण करणाऱ्या बस चालक व वाहक महिला यांच्या विरोधात तक्रार दाखल दिली आहे. पुढील तपास वाडा पोलीस करत आहेत.
