पालघर - डहाणू - नाशिक रोडवरील वेती येथे लग्नाचे वऱ्हाड घेऊन जाणाऱ्या पिकअप टेम्पो उलटल्याने भीषण अपघात घडला आहे. या अपघातात एकाचा मृत्यू तर २२ जण गंभीर जखमी झाले आहेत. डहाणूमधील गंजाड येथून लग्न कार्यक्रम आटोपून विक्रमगड सातखोर येथे जाणारा भरधाव पिकअप टेम्पो चालकाचे नियंत्रण सुटल्याने डहाणू - नाशिक रोडवरील वेती येथे पलटी झाला.
अपघाताच्या वेळी या पिकअपमध्ये टेम्पोमध्ये जवळपास ४० वऱ्हाडी होते. यातील एकाचा मृत्यू झाला असून, नाना चोथे (वय ६०) असे मृत व्यक्तीचे नाव आहे. अपघातात २२ जण गंभीर जखमी झाले आहेत. जखमींना उपचारासाठी कासा येथील उपजिल्हा रुग्णालयात दाखल करण्यात आले आहे.
यातील ५ जणांची प्रकृती चिंताजनक असल्याची माहिती वैद्यकीय अधिकाऱ्यांनी दिली आहे. तर एकाला गुजरातमधील वलसाड येथील रुग्णालयात उपचारासाठी हलविण्यात आले आहे. या मार्गावर वारंवार अपघाताची मालिका सुरूच असून याच ठिकाणी दोन दिवसापूर्वी झालेल्या अपघातात २ तरुणांचा देखील मृत्यू झाला होता.
