उस्मानाबाद - लोक कोणत्या गोष्टीचा कशासाठी वापर करतील याचा बिलकूल नेम नाही. कोरोना विषाणूला स्वतःपासून दूर ठेवण्यासाठी वापरण्यात येणारे सॅनिटायझर काहीजण कशासाठी वापरत आहेत, हे वाचल्यानंतर तुम्हालाही धक्का बसेल. कोरोनाच्या काळात वेळोवेळी हात सॅनिटाईझ करणे गरजेचे आहे. मात्र, जिल्ह्यात काही ठिकाणी याचा भलताच वापर सुरू झाला आहे.
सॅनिटायझरची गरज लक्षात घेऊन जिल्हाभरातील ग्रामपंचायतींनी घरोघरी जाऊन मोफत सॅनिटायझर वाटले आहेत. परंतु, सध्या या सॅनिटायझरचा हात निर्जंतुक करण्यासाठी कमी अन् चूल पेटवण्यासाठी जास्त वापर केला जात आहे. मुंबई, पुणे यासारख्या शहरांमधून कोरोना विषाणू ग्रामीण भागातही पोहोचला. बाधितांच्या संख्येत झपाट्याने वाढ झाली त्यामुळे हात सॅनिटाईझ करण्याचा सल्ला वारंवार दिला जात आहे. शहरी भागाप्रमाणे ग्रामीण भागातील लोकांमध्येही हात सॅनिटायझ करण्याचे प्रमाण वाढावे, या उद्देशाने ग्रामपंचायतींनी 14 व्या वित्त आयोगातून घरोघरी सॅनिटायझर तसेच मास्कही पुरवले.
हेही वाचा - "मुंबई ही मराठी माणसाच्या बापाचीच.. मान्य नसेल त्यांनी त्यांचा बाप दाखवावा"
सुरुवातीला हात निर्जंतुक करण्यासाठीच सॅनिटायझरचा उपयोग केला जात होता. मात्र, आता याचा रॉकेलप्रमाणे वापर केला जात आहे. सध्या पावसाळ्याचे दिवस आहेत. त्यामुळे सकाळी पाणी तापवण्यासाठी अथवा स्वयंपाकासाठी चूल पेटवताना ग्रामीण भागातील महिलांच्या नाकीनऊ येते. पूर्वी रॉकेलच्या साहाय्याने चुली पेटवल्या जात, परंतु शहरासोबतच ग्रामीण भागातही गॅस वापरणाऱ्यांची संख्या वाढल्याने रॉकेल मिळणे बंद झाले. कोणास ठाऊक रॉकेलप्रमाणे सॅनिटायझरही पेट घेते, हे कोणाच्या लक्षात आले. मात्र, ही खबर एका महिलेकडून दुसऱ्या महिलेकडे पोहचली अन् बघता-बघता सॅनिटायझरचा वापर निर्जंतूक करण्यासाठी कमी अन् चूल पेटवण्यासाठी अधिक सुरू झाला.
हेही वाचा - कंगनाला रणौतला आरपीआय देईल संरक्षण.. रामदास आठवले आले मदतीला
