नाशिक- तरुणांसोबत मुलांना देखील एक डॅशिंग पोलीस अधिकारी म्हणून विश्वास नांगरे पाटील यांचे नेहमीच आकर्षण राहील आहे. याचाच प्रत्यय नाशिकमध्ये आला आहे. उस्मानाबाद येथील साई गणेश पांचाळ या 11 वर्षीय मुलाने नाशिकचे पोलीस आयुक्त विश्वास नांगरे पाटील यांना भेटण्याची इच्छा डॉ. राज नगरकर यांच्या कडे व्यक्त केली. साईवर नाशिकच्या एस. सी. जी. मानवता कॅन्सर सेंटरमध्ये ब्रेन ट्युमर आजारावर उपचार सुरू आहेत.
हेही वाचा- श्रीराम लागू यांच्या पार्थिवावर धार्मिक विधी न करता शुक्रवारी होणार अंत्यसंस्कार
डॉक्टर नगरकर यांनी देखील तत्काळ साई याची इच्छा पूर्ण करण्यासाठी पुढाकार घेतला. त्यांनी विश्वास नांगरे पाटील यांच्याशी संपर्क साधून त्यांना मुलाची इच्छा सांगितली. नांगरे पाटील यांनीही आपल्या कामातून वेळ काढत, साईची पोलीस आयुक्त कार्यालयात भेट घेतली. यावेळी साईने तुमच्या सारखा पोलीस अधिकारी होण्याची इच्छा सांगताच नांगरे पाटील यांनी साईचा आत्मविश्वास वाढवा म्हणून त्याला स्वतःच्या खुर्चीवर बसून त्याच्याशी मनसोक्त गप्पा मारत त्याचे मनोबल वाढवले. यावेळी ट्युमर सारख्या मोठ्या आजाराशी लढत असलेल्या साईला सर्व काही स्वप्नवत वाटत आल्याचा आनंद त्याच्यावर चेहऱ्यावर दिसत होता.
