मनमाड - मनमाड जवळ असणाऱ्या "हडबीची शेंडी"(शेंडीचा डोंगर) येथे दोन गिर्यारोहकांचा ट्रेकिंग करताना मृत्यू झाला ( Shendicha Dongar Trekker Death ) आहे. खाली उतरताना खिळा निसटून 110 फूट खाली पडल्याने हा अपघात झाला आहे. अनिल वाघ आणि मयूर मस्के, अशी त्या गिर्यरोहकांची नावे आहे.
मिळालेल्या माहितीनुसार, शेंडीच्या डोंगरावर अहमदनगर येथील इंद्रप्रस्थ ट्रेकिंग व्यवसायिक ग्रुपचे 8 महिला आणि 7 पुरुष सदस्य आले होते. यावेळी ट्रेकिंग करुन 13 जण सुखरुप खाली उतरले. मात्र, सगळ्यांना खाली उतरवून ट्रेनर अनिल वाघ आणि मयूर मस्के खाली येत असताना खिळा निसटून दोघे 110 फूट खाली पडले. यामध्ये एकाचा जागीच मृत्यू झाला. तर दुसरा एकजण गंभीर होता. त्याचा रुग्णालयात उपचारावेळी मृत्यू झाला आहे.
ट्रेकिंग करणाऱ्यावर कारवाई करा
मनमाडला असलेल्या सातमाळ पर्वत रांगेतील अंकाई-टॅंकाई, गोरक्षगड आणि कातरा किल्ला यांच्या समोरच्या बाजूस हा शेंडीचा डोंगर मोठ्या दिमाखात उभा आहे. या सर्व पर्वतावर अनेक ट्रेकिंग ग्रुप येतात. मात्र, स्थानिक प्रशासन अथवा संबंधित पोलीस स्थानकाला याची माहिती नसते. त्यामुळे अशा घटना घडल्यानंतर मदत करण्यासाठी अडचणी येतात. म्हणून यापुढे ट्रेकिंग करणाऱ्यांवर कायदेशीर कारवाई केली जावी, अशी मागणी ग्रामस्थ आमिन शेख यांनी केली.
हेही वाचा - Mumbai Crime News : मुलुंडमध्ये थरार, बंदुकीचा धाक दाखवत एक करोड लुटले
