नाशिक - लोकसभा निवडणुकीत झालेल्या मतदानाची २३ मे रोजी मोजणी होणार असून, मतमोजणीची तयारी अंतिम टप्प्यात आली आहे. निवडणूक आयोगाने ही सर्व तयारी १७ मेपर्यंत पूर्ण करण्याचे निर्देश दिले आहेत.
या पार्श्वभूमीवर नाशिक लोकसभा मतदारसंघ आणि दिंडोरी मतदारसंघातील मतमोजणी अंबड सेंट्रल वेअर हाऊस गोडाउनमध्ये होणार आहे. या अनुषंगाने जिल्हा प्रशासनाने मतमोजणीची तयारी सुरू केली आहे. पुढील २ दिवसांत ही तयारी पूर्ण होईल, असे प्रशासनाच्या वतीने सांगण्यात आले आहे. यासंदर्भात आज निवडणूक उपजिल्हाधिकारी ए.बी. आनंदकर यांच्यासह अधिकार्‍यांनी स्ट्राँग रूमची पाहणी केली.
नाशिक आणि दिंडोरी या दोन्ही लोकसभा मतदारसंघात प्रत्येकी ६ विधानसभा मतदारसंघ आहेत. यासाठी विभाग निहाय ८४ टेबलवर मतमोजणी होणार आहे. तर पोस्टल बॅलेट मोजणीसाठी स्वतंत्र चारिटेबल राहणार आहे. त्यासाठी १ हजार ५०० अधिकारी आणि कर्मचारी या दोन्ही मतदारसंघाची जबाबदारी सांभाळणार आहेत. तर उमेदवार आणि त्यांचे प्रतिनिधी मिळून १ हजार लोक या ठिकाणी उपस्थित राहणार आहेत. त्यामुळे यावेळी १ हजारहून अधिक पोलीस अधिकारी आणि कर्मचाऱ्यांचा बंदोबस्त तैनात असणार आहे.
