नाशिक - गुन्हे शाखेत कार्यरत असलेले गुलाब सोनार हे आपल्या कुटुंबासमवेत पुण्याहुन नाशिककडे येत असताना त्यांनी सराईत सोनसाखळी चोरांचा सिने स्टाईल पाठलाग करून अटक केली. सोनार यांनी दाखवलेल्या धाडसामुळे पोलीस विभागाकडून त्यांच्यावर शुभेच्छांचा वर्षाव होत आहे. चोरांना पकडण्यात सोनार यांना पत्नी ज्योती आणि त्यांच्या साडू यांची मोठी मदत झाली.
हेही वाचा - नाशिकमध्ये वाचनालये सुरू, पहिल्याच दिवशी सार्वजनिक वाचनालयात वाचकांची गर्दी
सोनार यांच्या सोबत असलेल्या त्यांच्या पत्नीने या चोरांना पकडून ठेवले आणि आरडा-ओरडा करून लोकांना जमा केले. विशेष म्हणजे या आरोपींकडे धारदार शस्त्रास्त्रे असताना देखील ज्योती सोनार यांनी धाडसाने त्यांना पकडून ठेवले. आरोपींकडून चोरीच्या सहा सोन साखळ्यांसह चाकू, तलवार हे धारधार शस्त्र देखील मिळून आले आहेत. गेल्या काही वर्षांपासून पोलीस या दोन्ही आरोपींच्या मागावर होते. राजू उर्फ राजाराम खेटू राठोड (हडपसर) आणि नागेश बडवर (बेळगाव) या आरोपींनी आतापर्यंत मुंबई, सोलापूर, पुणे, सातारा या भागात सोनसाखळी चोरी केली आहे. सोनार दाम्पत्याने जिवाची पर्वा न करता दाखवलेल्या धाडसाचे सध्या शहरात कौतुक होत आहे.
हेही वाचा - लासलगावातील कांदा व्यापाऱ्यावर आयकर विभागाचे छापे; बाजार समितीतील लिलाव बंद
