येवला (नाशिक) - रासायनिक खतांकरता लागणारे गॅस व इतर साहित्याच्या किंमतीत वाढ झाल्यामुळे रासायनिक खतांच्या किंमतींमध्येही भरमसाठ वाढ (Massive Increase In The Price Of Chemical Fertilizers) झाली आहे. त्याचा फटका नक्कीच आता शेतकऱ्यांना बसत आहे. रासायनिक खतांकरिता लागणारा गॅस कोरोना महामारीमुळे कंपनीकडे उपलब्ध होत नसल्याने रासायनिक खतांचे उत्पादन घटले आहे. त्यामुळे रासायनिक खतांच्या किमतीत मागील वर्षीच्या तुलनेत 300 रुपयांनी वाढ झाली आहे. कधी अवकाळी पाऊस तर, कधी ढगाळ वातावराणाचा फटका शेतकऱ्यांना बसत असतांना रासायनिक खतांच्या किमतीत वाढ झाल्याने शेतकऱ्यांपुढे नवे संकट उभे राहिले आहे.
रासायनिक खतांच्या किमतीत वाढ रासायनिक खतांकरीता लागणारा गॅस उपलब्ध होत नसल्याने रासायनिक खतांच्या किमतीत तीनशे रुपये वाढ झाली असून, केंद्र सरकारने रासायनिक खतांसाठी लागणारा गॅस उपलब्ध करून दिल्यास नक्कीच रासायनिक खतांच्या किमती कमी होतील.
रासायनिक खतांच्या किंमती वाढल्याने शेतकऱ्यांना मोठ्या संकटांचा सामना करावा लागत आहे अवकाळी पावसामुळे मोठ्या प्रमाणात कांद्यासह इतर पिकांवर रोगाचा प्रादुर्भाव वाढल्याने, आम्हाला महागडी औषधे खरेदी करण्याची वेळ येत आहे. त्यातच आता खतांच्या किमती वाढल्याने पीक जगवायचे कसे? असा प्रश्न आम्हाला निर्माण झाला आहे. कृषिमंत्री दादा भुसे (Agriculture Minister Dada Bhuse) हे नाशिक जिल्ह्यातील (Nashik District) रहिवासी असून, त्यांनी तरी या खतावरील किमती कमी कराव्यात, अशी अपेक्षा शेतकरी करत आहेत.
