नाशिक - विवाह संकेतस्थळाच्या मदतीने ५० हुन अधिक घटस्फोटित महिलांशी लग्न करून त्यांची आर्थिक फसवणूक करणारा भामटा नाशिक पोलिसांच्या जाळ्यात अडकला आहे. पीडित महिलांनी एकत्र येत छत्रपती सेनेच्या कार्यकर्त्यांच्या मदतीने त्याला पोलिसांच्या हवाली केले आहे.
संपत दरवडे उर्फ मनोज पाटील व मयूर पाटील असे वेगवेगळी नावे सांगत विवाहाच्या संकेतस्थळावरून घटस्फोटित महिलांशी संपर्क साधायचा. त्यांचा विश्वास संपादन करून लग्नानंतर त्यांची आर्थिक फसवणूक करायचा. या भामट्याला नाशिक पोलिसांनी गजाआड केले आहे. हा तरुण शादी डॉट कॉम, जीवनसाथी डॉट कॉम, अशा वेगवेगळ्या विवाह नोंदणी संकेतस्थळावर आपल्या खोट्या प्रोफाईल बनवून टाकत होता. घटस्फोटीत व मूल बाळ आहे अशा महिलांना तो आपल्या जाळ्यात ओढत होता. लग्न केल्यानंतर परिवारातील सदस्यांचा विश्वास संपादन करून पैसे व सोन्याची मागणी करून ते मिळाल्यावर तो पोबारा करत असे.
हेही वाचा - नाशिक : हैदराबाद एन्काऊंटर प्रकरणी विद्यार्थीनींच्या संमिश्र प्रतिक्रिया
मालवण येथील एक पीडित महिला नाशिकच्या छत्रपती सेनेच्या कार्यकर्त्यांच्या संपर्कात आली आणि त्यांनी ह्या फसवणूक करणाऱ्या व्यक्तीबाबत माहिती दिली. ह्यावरून ह्या भामट्याला नाशिक गुन्हे शाखा पोलिसांच्या मदतीने पकडण्याची योजना आखण्यात आली. ह्यावेळी फसवणूक झालेल्या वेगवेगळ्या शहरातील महिला एकत्र आल्या होत्या.
नाशिकच्या एका महिलेला जाळ्यात ओढल्यानंतर पैसे घेण्यासाठी तो पंचवटीतील एका हॉटेलमध्ये आला. त्याच वेळी पोलिसांनी त्याच्या मुसक्या आवळल्या. पोलीस तपासात त्याचे खरे नावं संपत दरवडे असे असून तो औरंगाबाद येथील असल्याचे समोर आले आहे. त्याने वेगवेगळ्या विवाह संकेतस्थळांचा वापर करून ५० हुन अधिक घटस्फोटीत महिलांची फसवणूक केल्याचे समोर आले आहे.
हेही वाचा - हैदराबाद प्रकरणातील आरोपींना कठोर शिक्षा व्हावी ही जनभावना होती - बाळासाहेब थोरात
ह्या कारवाईत गुन्हे शाखेचे पोलीस निरीक्षक डॉ. सिताराम कोल्हे, संदीप पवार, संजय गामने, दिलीप डुमणे, गंगाधर केदार यांच्यासोबत छत्रपती सेनेतर्फे चेतन शेलार, नीलेश शेलार, तुषार गवळी, आदी कार्यकर्त्यांनी २ दिवस परिश्रम घेत संशयित आरोपीला पकडण्यात पोलिसांची मदत केली.
हेही वाचा - नाशिक: दोन लाचखोर पोलीस अधिकारी एसीबीच्या जाळ्यात
