नाशिक- शहरामध्ये पावसाने उघडीप घेतली असली तरी जिल्ह्यातील अनेक भागात शुक्रवारी मध्यरात्री जोरदार पाऊस झाला. शहरासह त्र्यंबकेश्वर, इगतपुरी, पेठ सुरगाणा आदी भागात पावसाने जोरदार हजेरी लावली. या पावसामुळे शेतकरी सुखावला आहे. मात्र, जोरदार पावसामुळे वाहतुकीला फटका बसला आहे.
पावसामुळे त्र्यंबकेश्वर शहरात पुन्हा एकदा गुडघाभर पाणी साचले होते. अनेक वाहने पाण्याखाली गेली होती. गौतमी, ब्रम्हगिरी डोंगरावरून येणारे पाणी तसेच शहरातील पाण्याचा निचरा होण्यासाठी योग्य नियोजन नसल्याने त्र्यंबकेश्वर शहर जलमय झाले होते. यामुळे काही वेळासाठी भाविकांची तारांबळ उडाली होती. त्याचबरोबर इगतपुरी तालुक्यातही जोरदार पाऊस झाला. मात्र या पावसामुळे शेतकरी वर्गात आनंदाचे वातावरण आहे. या भागात भाताची शेती होत असल्याने सुरू असलेला पाऊस शेतीसाठी अनुकूल असल्याचे शेतकऱ्यांचे म्हणणे आहे.
जिल्ह्यात होत असलेल्या पावसाने धरणे देखील चांगल्या प्रमाणत भरली आहेत. शहराला पाणी पुरवठा करणारे गंगापूर धरण ६१ टक्के भरले आहे. मात्र तरीही जिल्ह्यातील २४ धरणांमध्ये केवळ ३० टक्केच पाणी साठा उपलब्ध असून जिल्ह्यात अजून दमदार पावसाची आवश्यकता आहे.
