नाशिक - गेल्या महिन्याभरापासून सुरू असलेल्या निवडणुकीच्या प्रचाराचा धुराळा खाली बसलाय आहे. उमेदवारांबरोबरच पदाधिकारी आणि कार्यकर्त्यांनीही समाधानाचा सुस्कारा सोडला आहे. निवडणुकीच्या काळात दिवसभार धावपळीत दिसणारे विविध पक्षांचे लोक आता निवांत दिसू लागले आहेत.
निवडणुकीच्या काळात सर्व पक्षांच्या लोकांनी प्रचाराला वाहून घेतले होते. दैनंदिन जीवन बिघडले होते. रात्री उशिरा झोपायचे, पहाटे कामाला लागायचे असा एकूणच दिनक्रम ठरलेला होता. त्यातच ठिक ठिकाणच्या प्रचार रॅली ,चौक सभा, जाहीर सभा, जनतेच्या गाठीभेटी, याबरोबरच पदाधिकारी कार्यकर्त्यांचे रुसवे - फुगवे काढताना उमेदवारांची मोठी कसरत होत होती. एकदाची मतदान प्रक्रिया पार पडली आणि सर्वांनीच हुश्श म्हणत सुटकेचा निश्वास सोडला.
दुसऱ्या दिवशी बहुतेकांनी आराम करणे पसंत केले. तर काहीजण आकडेमोडीत दंग झाले होते. निवडणूक तर झाली पण जनतेचा कौल काय लागतो याची चिंता सर्वांनाच भेडसावत आहे. कोणी कितीही आश्‍वासित केले तरी उमेदवारांचे चित्त मात्र जागेवर नाही. २३ मेपर्यंत त्यांची द्विधा मनस्थिती राहणार हे मात्र नक्की.
या पार्श्वभूमीवर उमेदवारांचा कानोसा घेतला असता मनोरंजक गोष्टी ऐकावयला आल्या-
राष्ट्रवादी काँग्रेसचे उमेदवार समीर भुजबळ हे नाशिकलाच असून कुटुंबीयांसमवेत ते आपला बराचसा वेळ व्यथित करताना दिसत आहेत. प्रचाराच्या कालावधीत पत्नी शेफाली भुजबळ यांनी देखील स्वतःला प्रचारात झोकुन दिले होते. त्यामुळे मुलीशीही क्वचितच संपर्क होत राहिला. ही राहिलेली कसर भरून काढताना समीर भुजबळ यांनी कुटुंबीयांनाच वेळ देणे पसंत केले.
अपक्ष उमेदवार तथा माजी आमदार माणिकराव कोकाटे हे अल्पशा श्रमपरिहार करून आपल्या कार्यकर्त्यांच्या संपर्कात राहिले. गावोगावी असलेले कार्यकर्ते मित्रपरिवार यांच्याशी प्रत्यक्ष अथवा फोनवरून संपर्क साधून त्यांच्या प्रती कृतज्ञता व्यक्त करत आहेत. वंचित बहुजन आघाडीचे पवन पवार हे प्रथम पासूनच चर्चेत राहिले. मतांची मोठी व्होट बँक असल्याने तसेच दांडगा जनसंपर्क असल्याने पवन पवार यांनी आव्हान उभे केले होते. मतदान प्रक्रिया संपल्यानंतर पवार हे कार्यकर्त्यांच्या संपर्कात असून सर्वांचे आभार मानत आहेत.
महायुतीचे उमेदवार हेमंत गोडसे यांनी मतदान झाल्यानंतर दुसऱ्या दिवशी विश्रांती घेणे पसंत केले. यादरम्यान पदाधिकारी कार्यकर्ते यांच्या संपर्कात कायम राहिले. दोन दिवसानंतर गोडसे आपल्या निष्ठावंत कार्यकर्त्यां बरोबर देवदर्शनासाठी प्रयाण केले. पाच वर्षांपूर्वीही ते वैष्णो देवीच्या दर्शनासाठी गेले होते. यंदाही ते तिथेच गेल्याचे समजते.
