नाशिक - नातलगाच्या लग्नासाठी आलेल्या पुण्याच्या महिलेचे तब्बल ९१ ग्रामचे दागिने चोरट्यांनी पाळत ठेऊन पळून नेल्याची घटना घडली आहे. ही घटना २१ मे रोजी रात्री ११ वाजण्याच्या सुमारास जिल्ह्यातील चितेगाव फाट्यजवळील कुलस्वामिनी लॉनमध्ये घडली. या प्रकरणी सायखेडा पोलीस ठाण्यात गुन्हा दाखल करण्यात आला आहे. ही घटना सीसीटीव्हीमध्ये कैद झाली आहे.
पुण्यातील बालेवाडीच्या आराधना लोंखडे या आपल्या नातेवाईकाच्या लग्नासाठी, नाशिकच्या चितेगाव फाट्याजवळील कुलस्वामीनी लॉनमध्ये आल्या होत्या. त्या लग्न उरकून रात्री ११ वाजण्याच्या सुमारास परत पुण्याकडे निघण्याची तयारी करत होत्या. यासाठी त्या आपले सामान कारमध्ये ठेवत होत्या. तेव्हा पाळत ठेऊन बसलेल्या तिघांनी त्यांच्या अंगावरिल दागिने जबरदस्तीने हिसकावून पल्सर मोटारसायकलीवरून पळ काढला.
आराधना लोखंडे यांच्यासह त्यांच्या नातेवाईकांनी या चोरांचा पाठलाग करण्याचाही प्रयत्न केला. मात्र त्यांचा शोध लागला नाही. तेव्हा याप्रकरणी सायखेडा पोलीस ठाण्यात जबरी चोरीचा गुन्हा दाखल करण्यात आला आहे. पुढील तपास पोलीस करत आहेत. या दागिन्यांची किम्मत सुमारे अडीच लाख रुपये होती.
