नांदेड - गावाच्या सर्वांगीण विकासासाठी निवडणुका बिनविरोध करत ग्रामपंचायतीने एक आदर्श ठेवला आहे. कंधार तालुक्यातील भोजुची वाडी या ग्रामपंचायतीने निवडणुका न घेण्याचा निर्णय घेतला आहे. गावातील तरुण सतीश देवकते यांच्याकडे ग्रामपंचायतीची सर्व सूत्रे दिली आहेत.
खालच्या स्तराच्या राजकारणाला फाटा
निवडणुका म्हटले, की राजकीय पक्ष, गट-तट यासोबतच राजकारणदेखील आले. निवडणुकीच्या काळात सत्ता मिळवण्यासाठी साम, दाम, दंड, भेद यासर्वांचा वापर केला जातो. यामुळे अनेक चांगल्या कार्यकर्त्याला सत्तेपासून दूर राहावे लागते. मात्र खालच्या स्तराचे राजकारण टाळत ग्रामपंचायत निवडणुका बिनविरोध केल्यातर गावाचा विकास होतो. हाच संकल्प करत कंधार तालुक्यातील भोजूचीवाडी येथील ग्रामस्थांनी निवडणुका न घेण्याचे ठरवले आहे.
३५ वर्षांपासून बिनविरोध ग्रामपंचायत
भोजूचीवाडी या ग्रामपंचायतीत मागील ३५ वर्षांपासून निवडणुका झाल्या नाहीत. प्रत्येक वेळी गावकरी एकत्र येत सदस्य आणि सरपंच निवडतात. ग्रामपंचायत निवडणूक २०२१देखील बिनविरोध करण्याचा संकल्प केला आहे. १९८५पासून बिनविरोध निवडणुका घेण्याची परंपरा या गावात सुरू झाली आहे.
राष्ट्रपती पुरस्कार प्राप्त ग्रामपंचायत
एकीचे बळ या म्हणीनुसार भोजुची वाडी येथील ग्रामस्थांनी निवडणुका घेतल्या नाहीत. गावाच्या विकासासंदर्भात सर्व निर्णय एकमुखाने घेतले गेले. त्याचे फलित म्हणून २००६साली ग्रामस्वच्छता अभियानात राष्ट्रपती ए. पी.जे. अब्दुल कलाम यांच्या हस्ते पुरस्कार मिळाला. यासोबतच हागणदरीमुक्त गाव यासारखे अनेक पुरस्कार भोजुची वाडी ग्रामपंचायतीला मिळाले आहेत.
बिनविरोधसाठी तरुणांचा पुढाकार
निवडणुकीदरम्यान वाद होऊ नयेत, गटा-तटांमध्ये गाव विभागले जाऊ नये आणि विकास झाला पाहिजे या तत्वावर काही तरुण एकत्र आले आणि निवडणुका बिनविरोध घेण्याचा संकल्प केला गेला. सर्वानुमते सतीश देवकते या तरुण कार्यकर्त्याकडे पुढील सूत्र देण्यात आली आहेत.
आरक्षण सोडतीनुसार केला जाईल सरपंच
महाराष्ट्र शासनाने एक शासनआदेश काढून ग्रामपंचायत निवडणुकीनंतर आरक्षण सोडत होणार असल्याचे सांगितले आहे. त्यामुळे सरपंच कोण होणार, हे निवडणूक प्रक्रिया पार पडल्यावर ठरणार आहे. आरक्षण सोडतीनुसार देवकते सांगतील त्यांना सरपंचपद बहाल करण्यात येणार आहे.
