नांदेड - भररस्त्यात एका महिलेचा विनयभंग केल्याची घटना घडली शहरात घडली आहे. याप्रकरणी शिवाजीनगर ठाण्यात एकाविरुद्ध गुन्हा दाखल करण्यात आला आहे.
शहरात छेडछाड आणि विनयभंगाच्या गुन्ह्यात दिवसेंदिवस वाढ होताना दिसत आहे. अशीच एक घटना २७ जुलैला घडली. एक ४० वर्षीय महिला रात्री साडे ११ च्या सुमारास चिखलवाडी कॉर्नर येथून रिक्षाने साठे चौकाकडे जात होती. त्यावेळी रिक्षा बंद पडल्याने ती पायी चालत निघाली. त्याचवेळी रस्त्यावरुन दुचाकीने जाणाऱ्या शिवाजी देशमुख या व्यक्तीने संधी साधून या महिलेचा विनयभंग केला. यावेळी महिलेने आरडाओरडा केल्यानंतर एका व्यक्तीने घटनास्थळी धाव घेऊन महिलेची सुटका केली.
दरम्यान आरोपिने पळ काढला पण, यावेळी घटनास्थळी पडलेल्या आधार झेरॉक्सवरुन विनयभंग करणाऱ्या त्या व्यक्तीचे नाव शिवाजी देशमुख असल्याचे कळले. याप्रकरणी महिलेच्या तक्रारीवरुन शिवाजीनगर पोलिसांनी गुन्हा दाखल केला असून पुढील तपास सुरू केला आहे.
