नांदेड - भारत सरकारच्या मनुष्यबळ विकास मंत्रालयाच्या अंतर्गत सुरू करण्यात आलेल्या आणि विद्यार्थ्यांसाठी अतिशय उपयुक्त ठरलेल्या ‘स्वयम-एनपीटीईएल’ ऑनलाईन कोर्सेससाठी ऑनलाईन नाव नोंदणी सुरू झाली आहे. तर, २० जुलैपर्यंत ऑनलाईन नाव नोंदणी करणे आवश्यक आहे, असे स्वामी रामानंद तीर्थ मराठवाडा विद्यापीठाकडून कळविण्यात आले आहे.
विद्यापीठातून प्रचलित शिक्षण घेत असताना आपण आयआयटी, आयआयएस्सी, आयसर येथील प्राध्यापकांकडून देखील ज्ञानार्जन करू शकतो. तसेच त्याद्वारे विविध शाखातील नवनवीन ज्ञान अर्जित करू शकतो, हे स्वयम-एनपीटीईएलच्या विविध कोर्सेसची वैशिष्ट्ये आहेत. कला, वाणिज्य, व्यवस्थापनशास्त्र, विज्ञान-तंत्रज्ञान, वैद्यकीयशास्त्र, सामाजिकशास्त्र, अभियांत्रिकीच्या विविध शाखांमधील सुमारे ५३८ अभ्यासक्रमाचा स्वयम-एनपीटीईएलमध्ये अंतर्भाव आहे. या अभ्यासक्रमाला पदवी, पदव्युत्तर वर्गात शिक्षण घेत असलेले विद्यार्थी, शिक्षक, संशोधक विद्यार्थी तसेच विविध विद्याशाखांमधून शिक्षण पूर्ण करून नोकरी, व्यवसाय करत असणारे परंतु ज्ञानार्जनात करण्याची जिज्ञासा तसेच आवड असणारी कोणतीही व्यक्ती या अभ्यासक्रमासाठी नाव नोंदणी करू शकते.
स्वामी रामानंद तीर्थ मराठवाडा विद्यापीठाने विद्यापीठ अनुदान आयोगाच्या मार्गदर्शक तत्वांना अनुसरून श्रेयांक हस्तांतरण प्रणाली (Credit transfer Policy) तयार केली असून त्याचाही लाभ विद्यार्थी घेऊ शकतील. कोरोना विषाणूने जगभर थैमान घातलेले असताना, ऑनलाईन शिक्षणाचे महत्त्व दिवसेंदिवस अधोरेखित होत असून, स्वयम-एनपीटीईएल कोर्सेसच्या माध्यमातून बहुविध कोर्सेसचा खजिना सर्वांसाठी खुला आहे. यानिमित्ताने विद्यार्थी तसेच इच्छुकांना ऑनलाईन शिक्षण घेण्याची संधी असणार आहे. स्वयम-एनपीटीईएल अंतर्गत असणारे सर्व अभ्यासक्रम पूर्णतः मोफत असून केवळ प्रमाणपत्र मिळविण्याची इच्छा असणाऱ्यांसाठी नाममात्र शुल्क आकारले जाते. त्यासाठी ऑनलाईन अभ्यासक्रमाला २० जुलैपर्यंत ऑनलाईन नाव नोंदणी करणे आवश्यक असून नाव नोंदणी केल्याशिवाय परीक्षेचे ऑनलाईन अर्ज करण्याची संधी असणार नाही.
अशा प्रकारच्या ऑनलाईन कोर्सेसच्या जागरुकतेसाठी विद्यापीठात स्वतंत्र केंद्र अस्तित्वात आहे. सदर केंद्राला एनपीटीईएल, आयआयटी, मद्रास यांच्याकडून 'स्वयम-एनपीटीईएल लोकल चॅप्टर' म्हणून अधिकृत मान्यतादेखील मिळाली आहे. सदर केंद्राने अल्पावधीत चांगले यश मिळविले आहे.‘स्वयम-एनपीटीईएल' ऑनलाईन अभ्यासक्रमाला ऑनलाईन नाव नोंदणी आणि परीक्षा अर्ज दाखल करताना स्वामी रामानंद तीर्थ मराठवाडा विद्यापीठाच्या 'स्वयम-एनपीटीईएल' लोकल चॅप्टरचा पर्याय निवडावा. तसेच अधिक माहितीसाठी विद्यापीठ संकेतस्थळ किंवा 'स्वयम-एनपीटीईएल'च्या संकेतस्थळाला भेट द्यावी, असे विद्यापीठाच्या वतीने कळविण्यात आले आहे.
