नांदेड - येथील सराफा बाजारातील दुकानात अज्ञात दरोडेखोरांनी घुसून रवींद्र चक्रावार या व्यापाऱ्याची हत्या केल्याची घटना घडली होती. याप्रकरणी पोलिसांचा तपास सुरू असून सदर हत्या ही जुन्या वादाच्या कारणावरून करण्यात आली असल्याचे पोलिसांकडून सांगण्यात येत आहे. तसेच पोलिसांनी काही संशयितांना ताब्यात घेतले असून त्यांची कसून चौकशी करण्यात येत आहे. मात्र, भर पावसात झालेल्या या हत्याकांडाचा माग काढण्यात श्वानपथकाला अपयश आल्याचे सांगण्यात येत आहे.
शहरातील गुरूकृपा ज्वेलर्समध्ये अज्ञात दरोडेखोरांनी शुक्रवारी रात्री ९ वाजण्याच्या सुमारास दुकानात शिरून रवींद्र चक्रवार यांना कैचीने भोसकून त्यांची हत्या केली होती. या हत्येनंतर दरोडेखोरांनी दुकानातील काही दागिने लुटून नेल्याचेही सांगण्यात येत होते. मात्र, प्रत्यक्षात दुकानातील ३ लाखाची रोकड, पाव किलो सोने आणि किलोभर चांदी दुकानातच आढळून आली आहे. त्यामुळे ही हत्या नेमकी कशासाठी झाली याचा पोलिसांना उलगडा झाला नाही. मात्र, मारेकरी या दुकानातील सीसीटीव्हीच्या साहित्याचे नुकसान करून गेले आहेत. शिवाय घटना घडली त्यावेळी जोरदार पाऊस होता, त्यामुळे श्वान पथकाचा उपयोग होऊ शकला नाही.
हेही वाचा - नांदेडमध्ये दरोडेखोरांनी कैचीने भोकसून ज्वेलर्स व्यापाऱ्याचा केला खून, दागिने घेऊन पसार
ही हत्या जुन्या वादाच्या कारणावरून करण्यात आल्याचा निष्कर्ष पोलिसांनी काढला आहे. तसेच आर्थिक देवाण घेवाणचे काही वाद आहेत का, याचा पोलीस शोध घेत आहेत. शिवाय मृतक चक्रवार यांचे उमरी येथे काही जुने संपत्तीचे वाद असून त्यात गुन्हेही दाखल असल्याचे समजते. या सगळ्या घडामोडींमुळे जवळच्याच कुणीतरी पाळत ठेऊन चक्रवार यांची नियोजन पद्धतीने हत्या केल्याचा संशय व्यक्त होत असून सध्या पोलिसांचा त्यादृष्टीने तपास सुरू आहे.
हेही वाचा - नव्या मंत्रिमंडळात रातोळीकरांना संधी द्या, प्रवीण गायकवाड यांची मागणी
