नांदेड - कोणाशीही निष्ठा न राखणारा उमेदवार आपल्या मतदारसंघाशी निष्ठावंत कसा राहणार असा प्रश्न भाजपचे नेते सुभाष किन्हाळकर यांनी उपस्थित केला आहे. तसेच मतदारांनी भूलथापांना बळी न पडता अशोक चव्हाण यांच्या पाठिशी खंबीरपणे उभे राहण्याचे आवाहन त्यांनी केले आहे. भोकर मतदारसंघातील काँग्रेसचे उमेदवार माजी मुख्यमंत्री अशोक चव्हाण यांच्या प्रचारासाठी तालुक्यातील म्हैसूर-तांडा येथे प्रचारसभा घेण्यात आली. यावेळी सुभाष किन्हाळकर यांनी भारतीय जनता पक्षाच्या उमेदवारावर सडकून टीका केली.
भाजपचे नेते व माजी मंत्री माधवराव किन्हाळकर हे भोकर मतदारसंघातून उमेदवारी साठी इच्छुक होते. परंतु, पक्षाने त्यांना उमेदवारी नाकारल्याने त्यांनी काँग्रेसमध्ये प्रवेश करून अशोक चव्हाण यांच्या प्रचारात सहभाग घेतला आहे.
राज्यातील युती सरकारने तांड्याला निधी देणे बंद केल्याने मतदारसंघाची दुर्दशा झाल्याचे अशोक चव्हाण म्हणाले. तसेच काँग्रेसच्या काळात विकास कार्यक्रम राबवून तांड्याचा चेहरामोहरा बदलण्याचा प्रयत्न केल्याचा उल्लेख त्यांनी केला. राज्यात भोकर तालुका विकासाच्या बाबतीत एक नंबरवर आणू, असे आश्वासन चव्हाण यांनी आपल्या भाषणातून दिले. विकासकामांबद्दल बोलताना, तालुक्यात एकूण 64 पाणीपुरवठा योजना आणण्यात आल्याने पाण्याचा प्रश्न कायमस्वरूपी सुटणार असल्याचा विश्वाव त्यांनी व्यक्त केला.
मला तुम्ही सालदार म्हणून ठेवा; पण चुकीचा माणूस पुन्हा यायला नको, असे आवाहन अशोक चव्हाण यांनी केले. लोकसभेच्या वेळी जी चूक झाली; ती या वेळी होऊ देऊ नका, असे म्हणाले. तुमच्या प्रेमाची परतफेड विकासाच्या कामातून करणार असल्याचे चव्हाण यांनी भाषणातून सांगितले.
यावेळी मारोती बल्लाळकर, सुभाष कोळगावकर, रामराव पाटील, आनंद माजरीकर, सुभाष पाटील कोळगावकर, सुभाष किन्हाळकर यांसह पक्षाचे पदाधिकारी व कार्यकर्ते उपस्थित होते.
