नागपूर : शेतकऱ्यांच्या दृष्टीने अत्यंत महत्वाची बातमी आहे. गेल्या दोन दिवसात राज्याच्या विविध भागाला अवकाळी पावसाचा फटका बसला आहे. त्यामुळे शेतकऱ्यांच्या हाता-तोंडाशी आलेला घास हिरावला गेल्याने शेतकरी वर्ग हवालदिल झाला आहे. मात्र, १४ ते १७ मार्च दरम्यान पुन्हा अवकाळी पावसाचे सावट असल्याची माहिती नागपूर प्रादेशिक हवामान विभागाचे संचालक मोहनलाल साहू यांनी दिली आहे. यादरम्यान, अनेक विदर्भातील अनेक भागाला गारपिटीचा तडाखा देखील बसण्याची शक्यता वर्तवण्यात आली आहे. त्यामुळे शेतकऱ्यांना काढणीला आलेलं पीक १४ मार्च पूर्वी काढून सुरक्षित करावे, असे आवाहन हवामान विभागाकडून करण्यात आले आहे.
पुन्हा एकदा संकट? : मध्यंतरी नागपूरसह विदर्भाला उन्हाचा तडाखा सहन करावा लागला होता. काही शहरात तर तापमानाचा पारा 38 डिग्रीपर्यंत गेला होता. त्यांतच अचानक वातावरण बदलल्याने गेल्या दोन दिवसा विदर्भातील नागपूर, वर्धासह अनेक जिल्ह्यात अवकाळी पावसाची नोंद झाल्याने शेतकऱ्यांच्या पिकाची नासाडी झाली आहे. या धक्क्यातून शेतकरी सावरला नसताना पुन्हा एका अस्मानी संकट उभे ठाकले आहे.
या दिवशी पावसाचा अंदाज : येत्या १४ मार्च ते १७ मार्च दरम्यान पुन्हा अवकाळी पावसाचे सावट असल्याची माहिती हवामान विभागाकडून देण्यात आली आहे. एवढंच नाही तर दरम्यानच्या काळात गारपीट देखील होण्याची भीती व्यक्त करण्यात आली आहे. आजही विदर्भात काही ठिकाणी ढगाळ वातावरण असल्याने अवकाळी पावसाची शक्यता वर्तवण्यात आहे.
हवेची दिशा बदलली : साधारणपणे उन्हाळ्यात उत्तरेकडून उष्ण वारे दक्षिणेकडे वाहतात. मात्र, दक्षिणेकडील हवेचा जोर वाढल्याने उत्तरेकडील उष्ण वाऱ्यांचा जोर कमजोर पडला आहे. दक्षिणेकडील हवेत मॉस्चर असल्याने विदर्भात अप्पर ट्रफ वे म्हणजे (द्रोनिका) तयार झाल्याने विदर्भावर सलग चार ते पाच दिवस अवकाळी पावसाचा धोका असल्याची माहिती नागपूर प्रादेशिक हवामान विभागाचे संचालक मोहनलाल साहू यांनी दिली आहे.
तातडीने पंचनामे करण्याचे आदेश : अवकाळी पावसाचा फटका राज्यातील अनेक जिल्ह्यांना बसला असून मुख्यमंत्री एकनाथ शिंदे यांनी मुख्य सचिव, जिल्हाधिकाऱ्यांशी चर्चा केल्यानंतर परिस्थितीची माहिती घेत नुकसानग्रस्त शेतीच्या नुकसानीचे पंचनामे तातडीने करण्याचे निर्देश दिले आहेत. याशिवाय आवश्यक उपायोजना करण्याच्या सूचनाही मुख्यमंत्र्यांनी संबंधित अधिकाऱ्यांना दिल्या आहेत.
हेही वाचा : Rain Update : अवकाळी पावसाने पिके भुईसपाट, शेतकऱ्यांच्या हातातोंडाशी आलेला घास हिरावला
