नागपूर - राज्य सरकारने रक्तदान करण्याबाबत केलेल्या आवाहनाला नागपूर पोलिसांनी प्रतिसाद देत रक्तदान शिबीर आयोजित केले आहे. 600 पेक्षा जास्त नागपूरकरांनी या शिबिरामध्ये रक्तदान केले असल्याची माहिती पोलीस उपायुक्त गजानन राजमाने यांनी दिली. या रक्तदान शिबिराच्या माध्यमातून सर्वसामान्य नागरिकांनी 'कोरोना योद्धा व्हावे' असे आवाहन पोलिसांनी केले आहे. नागपूर पोलीस जिमखाना येथे हे रक्तदान शिबीर आयोजित केले आहे.
कोरोनाच्या वाढत्या प्रादुर्भावामुळे बहुतांश रुग्णालयांमधे रक्ताचा तुटवडा भासत आहे. आतापर्यंत सर्वसामान्य नागरिकांनी रक्तदान केल्यामुळे अनेकांचे जीव वाचवण्यात यश मिळाले आहे. मात्र, नागपुरातील कोरोना रूग्णांची वाढती संख्या लक्षात घेऊन पोलिसांकडून रक्तदान शिबीर आयोजित करण्याचा निर्णय घेण्यात आला. कोरोना विरुद्ध सुरू असलेल्या लढाईत रक्तदान करुन सहभावी व्हा, असा संदेश पोलिसांनी दिला आहे.
पोलीस जिमखाना येथे थर्मल स्क्रिनींग आणि सोशल डिस्टन्सिंगच्या नियमांचे पालन करत रक्तदान शिबीर आयोजित करण्यात आले. यामध्ये पोलीस दलाच्या अनेक जवानांनी रक्तदान केले. शिवाय तब्बल ६०० सर्वसामान्य नागरिकांनी देखील या रक्तदान शिबीरात सहभागी होऊन रक्तदान केले. रक्तदान करणाऱ्या नागरिक व पोलीस दलातील व्यक्तींना प्रमाणपत्र देऊन गौरवण्यात आले.
हेही वाचा- कोरोना अॅक्शन प्लान : नागपुरात दाखल होणार मुंबईची स्पेशल टीम, अनिल देशमुखांची माहिती
कोरोना संकटाच्या काळात पोलीस दल सुरुवातीपासूनच लढत आहे. सर्वसामान्य नागरिकांनी प्रत्यक्ष रस्त्यावर नाही तर रक्तदान करून या लढ्यात सहभागी व्हावे, असे आवाहन पोलीस उपायुक्त गजानन राजमाने यांनी केले आहे. कोरोनामुळे नागपूर पोलीस दलातील ४ ते ५ जवानांना वीरमरण आले आहे. कोरोनामुक्त झालेले अनेक पोलीस प्लाझ्मा दान करणार असल्याचे राजमाने यांनी सांगतिले. सामाजिक बांधिलकी म्हणून नागपूर पोलिसांनी हा उपक्रम राबवला, असे त्यांनी म्हटले.
हेही वाचा-नागपूर : पुरात अडकलेल्या नागरिकांना सुरक्षित स्थळी पोहोचविण्याचे कार्य सुरू
नागरिकांनी या शिबिराला दिलेला प्रतिसाद पाहता आपण एका नकारात्मक वातावरणातून सकारात्मक दिशेकडे वाटचाल करत आहोत, असे राजमाने यांनी सांगितले. कोरोनाला घाबरण्यापेक्षा कोरोना सोबत लढायला हवे, असे आवाहन राजमाने यांनी केले. रक्तदान शिबिराला मिळत असलेला प्रतिसाद पोलीस दलाप्रती नागरिकांची आपुलकी दाखवणारा आहे, असे राजमाने म्हणाले आहेत.
