नागपूर - राज्यात महाविकास आघाडीच्या सरकारने शेतकऱ्यांना मोठा दिलासा देण्याचे काम केले आहे. हिवाळी अधिवेशनात मुख्यमंत्री उद्धव ठाकरे यांनी शेतकऱ्यांसाठी सरसकट 2 लाखाच्या कर्जमाफीची घोषणा केली. महात्मा फुले योजनेंतर्गत ही कर्जमाफी मिळणार आहे. योजनेचा पहिला टप्पा शेतकऱ्यांना मार्चमध्ये मिळणार असल्याची माहिती मुख्यमंत्री ठाकरे यांनी आज सभागृहात सांगितले आहे. यासोबतच गोरगरिबांना 10 रुपयांत शिव-भोजन देणार, अशी घोषणाही मुख्यमंत्र्यांनी आज (शनिवारी) विधानसभेत घोषणा केली.
ज्या शेतकऱ्यांचे 2 लाखांपर्यंतचे कर्ज 30 सप्टेंबर 2019 पर्यंत थकीत आहे, अशा सर्व शेतकऱ्यांना कर्जमुक्त करत असल्याचे मुख्यमंत्री यांनी विधानसभेत जाहीर केले. महात्मा ज्योतिराव फुले शेतकरी कर्जमुक्ती योजनेच्या अंतर्गत ही कर्जमाफी दिली जाणार असल्याचे त्यांनी सांगितले. ही योजना मार्च २०२० पासून सुरु होणार आहे. सर्व अटी- शर्तीविरहीत ही कर्जमाफी करणार आहे. तसेच शेतकऱ्यांच्या थेट कर्ज खात्यामध्ये ही रक्कम जमा केली जाणार आहे. संपूर्ण योजनेत पारदर्शकता राहील, असे आश्वासनही मुख्यमंत्र्यांनी दिले.
हेही वाचा - विधीमंडळाच्या हिवाळी अधिवेशनाचा आज अंतिम दिवस; शेतकऱ्यांना काय मिळणार याकडे सर्वांचे लक्ष
2015 पासून थकीत असलेल्या कर्जाच्या कर्जमाफीचा निर्णय राज्य सरकारने घेतला आहे. कर्जमाफीसाठी शेतकऱ्यांना अर्ज करायची गरज नाही. रांगेत उभे राहायची गरज नाही. ऑनलाईन अर्ज आणि फोटो टाकण्याची गरज नाही. बायकोला घेऊन रांगेत उभे राहण्याची गरज नाही. आमचे सरकार शेतकऱ्यांचा मोकळेपणाने कर्जमुक्त करत असल्याचे मुख्यमंत्र्यांनी सांगितले.
हेही वाचा - 'जनादेशाचा अनादर करणारे हे सरकार जास्त काळ टिकणार नाही'
35 हजार कोटींची घोषणा करून 8 हजार कोटींची कर्जमाफी देणे फसवणूक होती. मी मुख्यमंत्र्यांचे अभिनंदन करतो. ही सर्वात मोठी कर्जमाफी असेल, असे अर्थमंत्री जयंत पाटील म्हणाले. तर सरसकट 2 लाखांचे कर्ज माफ केले. मात्र, सातबारा कधी कोरा होणार ते सांगा? असा आक्षेप विरोधी पक्षनेते देवेंद्र फडणवीस यांनी घेतला. सरकारचा निषेध करून भाजप सदस्यांनी यानंतर सभात्याग केला.
