नागपूर - छत्रपती उदयनराजे भोसलेंना शिवाजी महाराजांचे वंशज असल्याचे पुरावे मागितल्यावरून शिवसेना खासदार संजय राऊत यांच्या विरोधात नागपुरात चांगलेच वातावरण तापले. शुक्रवारी शहरातील महाल परिसरातील शिवाजी पुतळ्यासमोर संजय राऊत यांच्या फोटोला चपलांचा हार घालून फोटोला काळे फासत भारतीय जनता युवा मोर्चाने निषेध व्यक्त केला.
हेही वाचा - अजमेर बॉम्बस्फोट प्रकरणातील फरार दहशतवादी जलीस अन्सारीला कानपूरमधून अटक
राऊत यांनी उदयनराजे भोसलेंना छत्रपती शिवाजी महाराजांचे वंशज असल्याचा पुरावा द्यावा, असे वक्तव्य केल्यानंतर त्यांच्या विरुध्द छत्रपती शिवाजी महाराजांचे वंशज आणि शिवप्रेमी मावळे यांच्यात आरोप-प्रत्यारोपांचा सामना रंगला असताना आता यामध्ये भारतीय जनता युवा मोर्चाने सुद्धा उडी घेतली आहे. छत्रपती महाराजांच्या गादीसंदर्भात संजय राऊत यांनी केलेले वक्तव्य अपमानकारक असल्याचा आरोप करत भाजयुमोच्या कार्यकर्त्यांनी संजय राऊतांच्या फोटोला चपलांचा हार घालून फोटोला काळे फासले.
छत्रपती शिवाजी महाराज यांच्या गादीचा अपमान करण्याचा अधिकार कुणालाच नाही. सत्तेसाठी लाचारी पत्करून स्वतःला चाणक्य म्हणून घेणारे संजय राऊत नागपुरात आले, तर ज्याप्रमाणे त्यांच्या फोटोला चपलांचा हार घालून काळे फासून धिंड काढण्यात आली. त्याचप्रमाणे त्यांचीसुध्दा धिंड काढण्यात येईल, असा इशारा नागपूर भारतीय जनता युवा मोर्चाच्या अध्यक्ष शिवानी दाणी यांनी दिला आहे.
