मुंबई: गुजरातमध्ये जात असताना जागोजागी काँग्रेस आमदाराची अडवणूक करत असल्याचा आरोप आमदार यशोमती ठाकूर यांनी केला आहे. जाणून-बुजून आपल्याला अडवले जात असून दारू कशी गुजरातमध्ये जाते असा सवालही त्यांनी अडवणाऱ्या अधिकाऱ्यांना केल्याचा व्हिडिओ समोर आला आहे.
कुठे कुठे अडवले : काँग्रेसच्या आमदार यशोमती ठाकूर यांना सुरतला जात असताना वापी वलसाड आणि नवसारी या ठिकाणी पोलिसांकडून अडवण्यात आले. गुजरात पोलिसांना वारंवार आपण काँग्रेसचे आमदार आहोत आणि सुरतला जात आहोत हे सांगितल्यानंतरही प्रत्येक ठिकाणी आपल्याला चौकशीच्या नावाखाली नाहक 15 मिनिटे ते अर्धा तास थांबवण्यात आले. असा आरोप यशोमती ठाकूर यांनी केला आहे.
गुजरातला दारू कशी जाते : गुजरात पोलिसांच्या या कृतीला आपण घाबरत नसून आपण सुरतला जाणारच आहोत, असे त्या म्हणाल्या. काँग्रेसच्या नेत्यांना आणि आमदारांना जाणीवपूर्वक अडवले जात आहे. काँग्रेसच्या नेत्यांना आणि कार्यकर्त्यांना मुद्दाम अडवले जात आहे. त्यांची मुस्कटदाबी केली जात आहे. मात्र याला आपण घाबरत नसून दारू कशी गुजरातमध्ये जाते असा सवाल यावेळी यशोमती ठाकूर यांनी पोलिसांना केला. पोलीस मात्र त्यांना सांगताना दिसत होते की, आम्ही केवळ आमचे काम करीत आहोत आम्ही कोणालाही मुद्दाम अडवत नाही.
काँग्रेस कार्यकर्ते सुरतेला पोहोचू नये हा प्रयत्न : राहुल गांधी यांना समर्थन देण्यासाठी काँग्रेसचे अनेक नेते आणि कार्यकर्ते विविध भागातून सुरतमध्ये जमा होत आहेत. मात्र ते सुरतमध्ये येऊ नये याचा प्रयत्न गुजरात सरकारकडून केला जात आहे. राहुल गांधी यांच्या समर्थनासाठी सुरत येथे जात असलेल्या राज्यभरातील नेते आणि कार्यकर्त्यांना गुजरात पोलीस वेगवेगळ्या ठिकाणी अडवून ताब्यात घेत आहेत. हे निषेधार्ह असून गुजरात पोलिसांची ही वर्तणूक लोकशाहीचा गळा दाबणारी आहे. अशी प्रतिक्रिया काँग्रेसचे नेते बाळासाहेब थोरात यांनी व्यक्त केली आहे.
