मुंबई - कोरोना विषाणूचा प्रसार रोखण्यासाठी लसीकरण मोहीम सुरू आहे. लसीचा साठा नसल्याने गेले दोन दिवस लसीकरण बंद होते. मात्र, लसीचा साठा उपलब्ध झाल्याने आज शनिवारपासून मुंबई महापालिका व सरकारी रुग्णालयातील केंद्रांवर लसीकरण पुन्हा सुरू केले जात असल्याची माहिती आरोग्य विभागाने दिली.
लसीकरण बंद -
मुंबईत १६ जानेवारीपासून कोरोना प्रतिबंधात्मक लसीकरण मोहीम सुरू आहे. लसीकरणाला चांगला प्रतिसाद मिळत असल्याने लसीचा तुटवडा जाणवत आहे. यामुळे दर दहा दिवसांनी मुंबईत लसीचा तुटवडा जाणवत असल्याने लसीकरण मोहीम ठप्प पडत आहे. लसीचा साठा आल्यावर पुन्हा लसीकरण मोहीम सुरू केली जाते. ऑगस्ट महिन्यात १२, १३, १९ व २० ऑगस्ट या दिवशी लसीचा साठा नसल्याने लसीकरण मोहीम बंद ठेवण्यात आली होती.
हेही वाचा - एसटी कर्मचाऱ्यांना हवी रश्मीताईंकडून रक्षाबंधनाची भेट; वेतनावर कायमस्वरूपी तोडगा काढण्याची मागणी
लसीकरण सुरू -
बृहन्मुंबई महानगरपालिकेला एकूण १ लाख ६० हजार २४० कोविड प्रतिबंधक लसींचा साठा १९ ऑगस्टला रात्री प्राप्त झाला आहे. यानंतर २० ऑगस्ट हा लस साठा सर्व शासकीय आणि महानगरपालिका केंद्रांना वितरित करण्यात आला आहे. लस साठा प्राप्त झाल्याने, आज शनिवार दिनांक २१ ऑगस्टपासून मुंबईत कोविड लसीकरण मोहीम पुनश्च सुरू केली जात आहे. महानगरपालिकेला प्राप्त लस साठ्यामध्ये कोविशिल्डचे १ लाख ५० हजार तर कोवॅक्सिनचे १० हजार २४० डोस समाविष्ट आहेत, अशी माहिती आरोग्य विभागाने दिली.
