Maharashtra Politics: लोकसभा निवडणुकीच्या जागा वाटपावरून शिंदे गटाचे वाढले टेन्शनच; भाजप - शिंदे गट युतीत मिठाचा खडा पडण्याची शक्यता

राज्यात शिंदे-फडवणीस सरकारला एक वर्ष पूर्ण होत आले आहे. या एक वर्षात शिंदे फडणवीस सरकारची कामगिरी दमदार आहे, परंतु पुढल्या वर्षी होणाऱ्या लोकसभा निवडणुकीच्या जागा वाटपावरून भाजप व शिंदे गटात कुरघोडीचे राजकारण सुरू झाले आहे. शिंदे गटाकडून लोकसभेच्या २२ जागांची मागणी होणार असल्याचे जवळपास निश्चित आहे. सध्याच्या घडीला तरी शिंदे गटाला २२ जागा देणे भाजपला परवडण्यासारखे नसल्याने येणाऱ्या दिवसांमध्ये याच मुद्द्यावर भाजप-शिंदे गट युतीत मिठाचा खडा पडला जाण्याची शक्यता वर्तवली जात आहे.

मुंबई : २०२४ च्या लोकसभा, विधानसभा निवडणुकीसाठी भाजपने पूर्णपणे कंबर कसली आहे. विशेषतः कर्नाटकमध्ये झालेल्या विधानसभा निवडणुकीच्या निकालानंतर भाजप पूर्ण तयारीनिशी लोकसभा निवडणुकीच्या तयारीसाठी मैदानात उतरली आहे. याच अनुषंगाने राज्यामध्ये सुद्धा लोकसभेसाठी भाजपने 'मिशन ४५' अभियान हाती घेतले आहे. उद्धव ठाकरे यांच्या शिवसेनेतून शिंदे गट बाहेर पडल्यानंतर शिंदेंसोबत आत्ताच्या घडीला १३ खासदार आहेत. २०१९ च्या लोकसभा निवडणुकीत भाजपने २५ जागा लढवून २३ जिंकल्या तर उद्धव ठाकरे यांच्या सेनेने २३ लढवून १८ जागा जिंकल्या होत्या. तर दुसरीकडे राष्ट्रवादी काँग्रेसने १९ जागा लढून ४ जागेवर विजय मिळविला होता. तर काँग्रेसने २५ जागा लढून त्यांना अवघ्या एका जागेवर विजय मिळवता आला होता.

लोकसभा, विधानसभा निवडणुकीसाठी भाजपची तयारी

भाजप - शिवसेना शिंदे गट युती : २०२४ च्या लोकसभा निवडणुकीसाठी शिवसेनेकडून २२ जागांची मागणी केली जाऊ शकते. २०१९ मध्ये शिवसेनेने २३ जागा लढवल्या होत्या. मागच्याच महिन्यात मुख्यमंत्री एकनाथ शिंदे यांनी सर्व खासदारांची बैठक घेऊन त्याबाबत आढावा घेतला होता. मुख्यमंत्री एकनाथ शिंदे यांच्याकडे सध्या १३ खासदार आहेत. तर शिवसेनेचे उर्वरित ५ खासदार हे ठाकरे गटासोबत असल्याने त्याही जागांबाबत एकनाथ शिंदे आग्रही आहेत. भाजप - शिवसेना शिंदे गट युतीमध्ये कुठलीही अडचण नसून समन्वयाने काम केले जात आहे. समन्वयानेच जागावाटप होईल. त्यामध्ये कुठलीही अडचण येणार नाही, असे उपमुख्यमंत्री देवेंद्र फडणवीस यांनी जरी सांगितले असले तरी सुद्धा जागावाटप हा युतीसाठी फार महत्त्वाचा विषय असणार आहे.

भाजपमध्ये चिंता : लोकसभेसाठी मिशन ४५ साठी भाजपने पूर्णपणे कंबर कसली आहे. त्याचा आढावा सर्वच मतदारसंघांमध्ये घेतला जात आहे. अशा परिस्थितीत एकनाथ शिंदे गटाला २२ जागा कशा द्यायच्या? याची चिंता भाजपमध्ये राज्यापासून केंद्राला पडलेली आहे. याच अनुषंगाने भाजपने शिवसेनेच्या (शिंदे गट) १३ खासदारांच्या मतदारसंघावर संयोजक नियुक्त केले आहेत. या मतदारसंघांमध्ये मोदी@९ अंतर्गत जनसंपर्क अभियान सुद्धा सुरू केल्याने एकनाथ शिंदे गटात अस्वस्थता निर्माण झाली आहे. भाजपच्या या प्लान बीवरून शिवसेना-भाजप युतीमध्ये मिठाचा खडा पडण्याची शक्यता मोठ्या प्रमाणात वर्तवली जात आहे.

कमीत कमी २२ जागा : शिवसेनेचे खासदार गजानन कीर्तिकर यांनी मागच्या महिन्यात थेट भाजपकडून सापत्न पणाची वागणूक मिळत असल्याचा आरोप केला होता. परंतु अंतर्गत मध्यस्थीनंतर त्यांनी त्यावर घुमजाव ही केला. शिंदे यांच्या शिवसेनेने राज्यातील २२ लोकसभा मतदारसंघावर दावा ठोकल्याने भाजपची डोकेदुखी मोठ्या प्रमाणात वाढली आहे. भाजपने सुद्धा प्लॅन बी तयार करत २०२४ मध्ये लोकसभेच्या ४५ जागा जिंकण्याचे ध्येय ठेवले आहे.

मुख्यमंत्री एकनाथ शिंदे यांच्यासोबत झालेल्या शिंदे गटाच्या खासदारांच्या बैठकीमध्ये संपूर्ण आढावा घेतल्यानंतर कमीत कमी २२ जागा तरी आम्हाला हव्या आहेत - अ‍ॅडवोकेट वैजनाथ वाघमारे

खासदारांच्या बैठकीमध्ये संपूर्ण आढावा : परंतु कुठल्याही परिस्थितीत २२ जागांपेक्षा कमी जागा लढवणार नसल्याचे शिंदे गटाकडून सांगण्यात येत आहे. याविषयी बोलताना शिंदे गटाचे प्रवक्ते अ‍ॅडवोकेट वैजनाथ वाघमारे यांनी सांगितले आहे की, आताच्या घडीला जरी शिवसेनेसोबत १३ खासदार असले तरी उद्धव ठाकरे गटाकडे असलेले ५ खासदार जागाही शिंदेंकडेच आहे. ज्या पद्धतीने राज्यात शिंदे गटाची ताकद वाढत आहे, ते पाहता २२ जागा आम्हाला दिल्याशिवाय भाजपकडे पर्याय नसणार आहे, असेही ते म्हणाले आहेत.

हेही वाचा :